La ñegativa de la Xunta Elleutoral a almitir un escritu por tar n’asturianu espeya nidiamente la insuficiencia de la Llei d’Usu y la urxente necesidá d’Oficialidá
Tres de 19 años almitiendo documentación escrita n’asturianu, la Xunta Elleutoral insiste agora en ñegar el drechu a dirixise a ella nesta llingua. P’Andecha Astur, única organización que se dirixó a esti organismu utilizando l’asturianu y poro, la única que careció d’esta discriminación llingüística, “esto supón un reblagu más nel procesu de represión llingüística que carecemos nel nuesu país, y espeya l’antidemocrática situación d’indefensión na que mos afayamos los asturianos que decidimos emplegar la nuesa llingua”.
El drechu a utilizar l’asturianu en tol procedimientu elleutoral ganólu Andecha Astur ante’l Tribunal Costitucional nel añu 2.000, polo qu’el partíu presenta dende entos les sos candidatures y ufre les sos papeletes n’asturianu, siendo fasta agora l’unicu partíu que fae usu d’esti drechu -lo que nun dexa de ser una incongruencia por parte d’otros partios que se dicen favoratibles a la oficialidá-. De fechu, el resto de la documentación presentada por Andecha ante la Xunta Elleutoral foi almitía n’asturianu.
La non oficialidá de la llingua asturiana y la falta de garanties de que los vocales pescancien el testu son los argumentos de la decisión de la XE.
Andecha Astur recurrirá esti determín ente’l Tribunal Supremu, al tiempu que s’entruga “ónde ta la coherencia de los partíos políticos que dicen defender la oficialidá del asturianu y, nin la usen nes sos rellaciones coles istituciones, nin aprofiten el drechu a sacar papeletes n’asturianu, y que guarden un silenciu cómpliz énte lo que ye un inxustificable casu de represión llingüística”.
Redaición InfoAsturies
This work is licensed under a Creative Commons Attribution 4.0 International License.
