Tolos díes son de la Llingua. Esconsoñar, afalagar a la reciella, entainar cola xera diario, colexos, trabayos, tiendes, mélicos, alministraciones, vecinos; ya en ca pasu, en cada pallabra, nun traicionase

Llucía F. Marqués

Caltener los güeyos al camareru y repetir, sí, con xelu, café ensin zucre, con xelu. Desplica-y ca mañana al vendeor de billetes qu’Uviéu ye la capital d’Asturies, onde ta la catedral, ya entrar en bucle -“Ah, Oviedo” “sí Uviéu” “Oviedo” “Uviéu”-. Correxir discretamente al to fiu cuando al aportar a clas camuda la llingua. Sorrir cuando na llibrería te despiden con un “ta lluéu” que sabe a victoria.

Pero hai dies nos que lluchar con más enfotu qu’otros, díes que pidin de nos un actu cosciente estra. Güei ye ún d’ellos, primer vienres de mayu, díi les Lletres Asturianes, Mani de les Lletres. Nun pue faltase, somos guerreros de la pallabra y esta ye una de les batalles emportantes. La otra, la decisiva, daráse’n malpenes 23 díes, cuando tengamos la oportunidá de ser congruentes, votu en man, y votemos n’Asturianu.

Oficialidá, darréu. Vémonos n’Uviéu, collacios.

This work is licensed under a Creative Commons Attribution 4.0 International License.