Asociaciones culturales, chigres, bandes de gaites, asociaciones de vecinos, músicos, ensiñantes, clús esportivos, grupos de baille’l país, colleutivos d’inmigrantes, ecoloxistes, sindicatos y partios políticos… abulta imposible que col sofitu de toles estayes de la sociedá asturiana nun s’algame la Oficialidá
La primer cita d’esta primavera pol asturianu ye mañana a les 6 de la tardi, na Plaza l’Humedal de Xixón, y la viniente pocu menos d’un mes dempués, nel Díi les Lletres Asturianes.
Trátase con esti manifestamientu repetir l’ésitu de la convocatoria del añu pasáu, cuando más de 25.000 asturianos desixeron el respetu a los sos drechos llingüísticos. N’aquel intre, col teóricu sofitu del PSOE, Podemos ya IU, y cola sociedá asturiana en plenu reclamandola, facíase imposible que la oficialidá nun se declarare darréu.
Sicasí, un añu más tardi, pocu s’avanzo ya sigui ensin haber naide que, dende los grupos que tienen representación na Xunta del “Principado”, dende los conceyos o dende la representación d’Asturies nel parllamentu español, s’atreva a dar el pasu definitivu que ponga la nuesa llingua nel llugar que-y correspuende.
Poro, los asturianos y asturianes nun tenemos otra que tornar a salir mañana a la cai, y otra vegada el mes que vien, y toles vegaes que faiga falta -y van más de trenta años-, a siguir glayando:
¡L’Asturianu, Llingua Oficial!
Llucía F. Marqués
This work is licensed under a Creative Commons Attribution 4.0 International License.
