Mañana ye’l díi: a pola Oficialidá

  • 20 Abril, 2018

Pa quien ande entá despistáu, la cita ye mañana, sábadu 21 d’abril de 2.018, a les doce’l mediudíe delantre la estación de tren d’Uviéu, una fecha que toos esperamos que seya hestórica

Con más de cien entidaes sofitando esplicitamente’l manifestamientu pola Oficialidá, l’asistencia espérase masiva. Debiera de selo, ¿non? Nun se puede esperar otra cosa depués del sofitu esplícitu a la Oficialidá de la llingua apurríu pola sociedá asturiana en pleno, con declaraciones d’encontu de cuasique tolos partios, dende los más hestóricos defensores dica los más tradicionales y emperrinchaos enemigos de lo asturiano, colos sindicatos de tolos seutores del mesmu lláu, incluyendo los qu’enxamás usaron una pallabra na nuesa llingua en cartelos, comunicaciones y discursos, con asociaciones de toa triba  -musicales, feministes,de families, ganaderes, de vecinos, lliteraries, culturales…) grupos musicales, clús esportivos, editoriales y chigres, pente otros, representando toles estayes del pueblu asturianu.

Mesmo si siguen faciendo oyíos sordos y del alcuentru de mañana nun surde la reación política esperada, qu’oficialice la llingua nacional darréu, l’aición combinada de tolos que se acaben de posicionar a favor de la Oficialidá faela inaparable. Porque si de verdá los partíos quieren y los sindicatos quieren y la xente quier, si la voluntá política de quienes participen nesta convocatoria ye real ¿Quién lo puede evitar?

 

Namás una cabera reflesión. Una vegada algamáu’l drechu, cola Oficialidá pola que tanto lluchemos na man, que nun mos quieran timar: querémosla con conteníu y fechos, non más papel moyao. La Oficialidá ye’l primer pasu pa la recuperación y dignificación del asturianu, un pasu perimportante, urxente ya imprescindible, por supuestu, pero el camín sigue.

Llucía F. Marqués

 

 

 

 

 

 

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies