El conflictu entamare’n 2016, cuando les emplegaes decidieron que nun aguantaríen más el tratu de la xestora Servicios Dindurra, al cargu de les cafeteríes de Marina Civil ya l’aulariu Sur del Campus de Xixón. Denunciaben condiciones llaborales indignes, un fuerte acosu por parte de la empresa a les trabayaores, costantes vexames, berros y humildaciones por parte de la patronal -que llevaron a delles de les trabayadores a solicitar la baxa llaboral por ansiedá y depresión- y a la fin d’esi mesmu añu, l’impagu de salarios.
La rescisión del contratu con S. Dindurra y los retardos na nueva concesión retrasaron fasta’l 2019 la reapertura de les cafeteríes, pero cuando por fin se fae lleva como xestores a les mesmes emplegaes, al traviés d’una concesionaria creada esprofeso col envís de dar salida al conflictu y caltener los sos puestos de trabayu, Macepeda SL, que se compromete a recontratar a toles antigües emplegaes que quieran volver a trabayar nes cafeteríes.
Arguyoses de la so llucha, les trabayaores nun quieren que s’escaezan les imáxenes de la mesma nin la solidaridá recibida por parte d’otres organizaciones «Con estes semeyes entamamos y con estes semeyes queremos cerrar el conflictu, que nun ye el final porque agora entama otra llucha, la llucha por sacar un nuevo proyeutu alantre».
Nuria Prendes
This work is licensed under a Creative Commons Attribution 4.0 International License.