Depués del #SidraChallenge, nel que mos retaben a echar un culín nes redes, aporta #OficialidáChallenge, que mos convida a subir a les redes vidios defendiendo la oficialidá de la llingua asturiana

Dientro’l marcu d’actividaes entamaes alrodiu de la convocatoria a manifestase’l 6 d’Abril en Xixón pola Oficialidá de la llingua’l país,  #OficialidáChallenge ta faciendo viral la revindicación llingüística al traviés de vidios, personales o de grupu, nos qu’asturianos y foriatos faen públicu el so sofitu a la reconocencia de los drechos llegales del asturianu y conviden a participar nel manifestamientu del sábadu 6 en Xixón.

La Xunta Pola Defensa la Llingua, organizadores de la campaña, llamen tamién a visibilizar la mesma incluyendo nos perfiles de les redes sociales les imáxenes azules llamando a la mani. Busquen con ello repetir el nivel de rempuesta y compromisu qu’algamó la sociedá asturiana nel caberu manifestamientu pola oficialidá n’Abril del añu pasáu, nel que participaron más de 25.000 persones.

Tais nominaos. #OficialidáChallenge.

This work is licensed under a Creative Commons Attribution 4.0 International License.