Esmolición pola posible llegada a la costa asturiana de los vertíos procedentes del Grande América, ante la falta de recursos pa enfrentar la contaminación

A la vista l’acidente y naufraxu del buque Grande América, el pasáu 12 de Marzu, frente les costes atlántiques franceses, que dió llugar a l’activación darréu de los Planes especiales de Llucha contra la Contaminación Marina n’España, el País Vascu y Cantabria, y ante la posibilidá de llegada a les nueses costes de la contaminación surdía nel acidente, el Conseyeru de Presidencia y Participación ciudadana del “Principado”, Guillermo Martínez activa, 9 díes depués, el Plan de Continxencies por Contaminación Marina Accidental

Sicasí, sigún la Coordinadora Ecoloxista d’Asturies, en casu de llegar de fechu esta contaminación a les costes asturianes, la falta de medios riales, tantu humanos comu materiales, pa minimizar los daños d’estos acidentes fadrá d’esta otra nueva llaceria ecolóxica y ambiental a sumar al deterioru de la costa asturiana.

La improvisación ya’l voluntariáu sustituyen la infracadarma y los medios necesarios, comu se demostró n’anteriores catástrofes. Arriendes d’ello, sigui ensin haber un cientru públicu pa la recuperación de la fauna dañada por estos acidentes, polo que los animales petroleaos que se recueyen tienen poques esperances de vida.

La mar asturiana, denuncien, ya carez graves problemes de contaminación derivaos de los vertíos de les istalaciones industriales y de los deficientes o inesistentes sistemes de depuración de les agües residuales de les poblaciones.

This work is licensed under a Creative Commons Attribution 4.0 International License.