La edición tercera de los Premios TAKE fai estrena una modalidá nueva, la de Meyor Actor/Actriz de Doblaxe d’Asturies, y el primeru que va recibir el gallardón nesta categoría ye Carlos Novoa
La de Carlos Novoa ye una voz bien reconocida de la radiu asturiana, siendo ésta musical, d’informativos, de magacines o de tresmisiones deportives. Anicia la so trayeutoria como llocutor a lo último de 1979 nos 40 Principales pa siguir n’Antena 3, COPE, Onda Cero, Radio Vetusta y RPA. Tamién fizo televisión.
En 2011 entama a trabayar como actor de doblaxe de la man de Gonzali Producciones con dellos papeles, hasta participar en 2013 na primera de les películes doblaes al asturianu qu’emitió la TPA, El Rostru Impenetrable, onde ponía-y voz a Marlon Brando. N’otros doblaxes fechos pola mesma productora pa la televisión autonómica sedría tamién voz de Clint Eastwood, Tom Hardy, Robert Downey Jr. y George Clooney.
Carlos Novoa imparte talleres de llocución na Escuela de Doblaxe d’Asturies.
This work is licensed under a Creative Commons Attribution 4.0 International License.
