• Portada
  • >
  • Conceyos
  • >
  • L’asesinatu de Javier Ardines saca a la lluz la corrupción llanisca

L’asesinatu de Javier Ardines saca a la lluz la corrupción llanisca

  • 21 Setiembre, 2018
Al frente de la conceyalía de Personal, Mediu Rural y Playes, la llinia política d’Ardines destacó pola llucha polo rural y pesquero nun conceyu marcáu pola masificación turística y la especulación urbanística. La so firme determinación de finar cola contratación “a deu” y les cadenes de favores tamién fizo que ganare enemigos asgaya
Fasta onde sabemos, a Javier Ardines, l’únicu edil d’IU nel ayuntamientu de Llanes, atacáronlu dos o tres persones al riscar, al par de casa, camín de la mar. Golpeáronlu ya estranguláronlu fasta la so muerte. El so asesinatu sigue ensin esclariar y la repercusión mediática del fechu dista de ser la que correspuende al que podría ser una muerte por motivos políticos que mos lleva de vuelta a tiempos más escuros de la hestoria d’Asturies. Los vecinos tiénenlo claro “Si ye político ye gurdio, y si ye gurdio, tápenlo. Si nun lo fuere, a estes altures ya saldríe daqué”.

El conceyal, que renunciare al so salariu y dietes municipales “por coherencia” y vivía de la pesca, cuntaba con abondosos enemigos nel entornu políticu llaniscu, destacáu polo turbio y enllamuergao. Dende que la xunión de cuatro partíos (Vecinos por Llanes, IU, Foro Asturias y PP) finó va tres años cola so estraña coalición colos 28 años d’hexemonía Pesoista   (con siete mayoríes dafeches pente 1987 y 2015), l’ambiente municipal yera cuando menos tensu.

La llista de sospechosos de deseyar la muerte de Javier Ardines (perxudicaos por dalguna aición de so) ye llarga: familiares, conocíos, interinos del ayuntamientu, policíes llocales, políticos, empresarios de la costrución y dueños de chiringuitos playeros… una llarga llista na que alcontramos munchos cercanos a la ex alcaldesa, Dolores Álvarez Campillo (2004-2015), anantes conceyala d’Urbanismu y agora diputada autonómica pol PSOE. Nos 11 años del so mandatu Llanes camudó reiteradamente l’empedráu y pavimentu, pa beneficiu de la empresa Calizas Ornamentales, casualmente propiedá de los hermanos de la alcaldesa, con contratos por valor de más de 1,5 millones de euros.

L’empresariu indianu Juan Antonio Pérez Simón destaca tamién pente los perxudicaos en casu de que camudare’l profitosu sistema de facer negociu en llanes. Presente n’abondos negocios inmobilarios Pérez Simón tenía empreses en común (Hormigones de Meré SL) cola familia de l’alcaldesa Álvarez Campillo, foi elli quien impulsó (vía licencia municipal exprés) l’ampliación del hotel Kaype, en primer llinia de la playa de Barros— paralizada pola Xusticia, que ordenó’l so derribu y pola que los dueños del hotel solicitae una indemnización de cuasi 18 millones d’euros al actual Conceyu de Llanes.).

Les perres del turismu, la corrupción funcionarial, l’intercambiu de favores… tou ello contribui a un ambiente pocu afayaizu pal desendolque de la llabor na casa conceyu: el sabotaxe de decenes de trabayaores puestos a deu pol PSOE paraliza les xestiones más allá de lo almisible, les baxes multiplíquense ensin xacíu, les xestiones faense mal a costafecha, dalgunos de los téunicos niéguense direutamente a facer el so trabayu… La idega ye caltener tou paralizao fasta la vuelta’l PSOE. Nesi ambiente nun ye d’estrañar qu’una persona decidía a denunciar los fechos y camudar les circustancies resulte incómoda.

Ardines foi el principal responsable de la formación del cuatripartito nuna coalición de “toos contra’l PSOE”, cosciente de que’l partíu furrulaba comu una rede clientelar d’intereses, sofitada en bona midía pola estaya más drechista de Llanes.  Yera elli tamién el cabezaleru na dura llucha interna pa gobernar un ayuntamientu con tolos trabayaores en contra.

Munchos funcionarios ocupaben la plaza “provisionalmente”, dalgunos dende va más de venti años, pendientes d’unes oposiciones paralizaes. “Ye una casualidá, de xuro, que gran parte de los trabayaores del ayuntamientu seyan militantes del PSOE”, dixo’l conceyal a la prensa meses anantes de ser asesináu.

Si el PSOE nun gana les prósimes eleiciones, el chiringuito preslla y son munchos los que pierden la so posición privilexada. La convocatoria pública d’emplegu pondría en riesgu a munchu enchufáu y la cadena de favores podría francese, dexando munchos perxudicaos. Y Ardines yera quien más movía les agües.

Otru tema nel que l’asesináu estorbaba yera l’aprebación de los antiguos planes d’espansión urbanística de Llanes. El caberu PGOU, propuestu polos socialistes y refugáu pol actual gobiernu, plantegaba la costrución de 13.000 viviendes, nun conceyu con 14.000 habitantes nel que la especulación y la masificación turística vraniega paez xustificar cualisquier desmán. Comu amuesa del ensin xacíu del plan, la propuesta de crear más d’ochocientes viviendes en pueblos ensin siquier alcantarillau nin saneamientu, nos que moren pocu más de doscientos vecinos.

A naide en Llanes estrañaría qu’esti seya un casu d’asesinatu políticu, pero casu de que nun lo fore, polo menos puede decise qu’esta muerte nun foi en baldre: como mínimo sacó a la lluz el panorama enllordiáu qu’escuenden les playes llanisques. Daqué tendrá de camudar.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies