El bencenu, un de los contaminantes que más faen medrar el riesgu de cáncanu, ye’l principal problema ambiental de la capital d’Asturies, reconocía comu la ciudá del estáu con más altos niveles d’esti componente
Ayer vivióse n’Uviéu otru díe más n’alerta pol altísimu nivel de contaminación de bencenu, continuando asina con una llinia d’emisiones qu’entamó va más d’una quincena, ocasionando l’esmolecimientu y les quexes de los vecinos del alrodiu, que ven a diariu les fumaraes prietes que surden de les chimenees.
El domingu algamóse un picu de 22 µg/m3 de bencenu na estación del cientru de Trubia, presentando una media nes caberes 24 hores d’ayer de 7,2 µg/m3 frente al valor de referencia añal pa esti peligrosu contaminante nes guíes de la Organización Mundial de la Salú (OMS) que tá en 1,7 µg/m3 de media. Los picos de contaminación del benceno tabién s’apreciaron ayeri na estación de Ventanielles, la otra estación que da los datos en continuo de bencenu nel conceyu, a 14 kilómetros, lo que da idea del algame del problema.
Esti problema va careciéndose n’Uviéu va décades, cola complicidá del “Principado” y foi namás dende la istalación d’estaciones midiores que s’entamen a conocer los datos concretos d’una contaminación que ya denunciaben los vecinos muncho anantes.
Los picos de contaminación atmosférica disparen los ingresos hospitalarios n’Asturies por enfermedaes respiratories, acordies a un estudiu epidemiolóxicu desendolcáu pola conseyería de Sanidá nel añu 2016. L’estudiu ye concluyente y vien a demostrar que la Conseyería de Infraestructures vien falsiando la realidá cuando niega la contaminación del aire y los sos efeutos na salú de los asturianos.
Redaición InfoAsturies
This work is licensed under a Creative Commons Attribution 4.0 International License.
