L’anunciu de la inclusión d’un puntu “antiacosu” en Metrópoli, entendíu como un espaciu informativu, de prevención y acompangamientu p’actuar contra la violencia sexual foi recibíu con gayola polos estremaos coleutivos del movimientu feminista, quienes espardieron la noticia del primer “Puntu Lila” d’Asturies como una amuesa de compromisu y responsabilidá.Sicasí, les numberoses quexes que foron sintiendo sobro’l serviciu ufiertáu nel puntu, ficieron que delles muyeres de la Plataforma s’averaren a Metrópoli a comprebar la so funcionalidá, alcontrándose col difícil percorríu que tendría que siguir una muyer en pelligru o agredía en casu de necesitalo.

Lo primero en llamar l’atención ye que nun apaeza nel mapa nin na programación de los eventos, lo que complica la llabor d’aportar a elli, másime si se diere un casu d’emerxencia.  Cuando por fin lo alcuentren, escasamente señalizao, nun hai más qu’un cartón con rótulu nun mostraor que naide atiende mientres más de media hora, daqué al paecer avezao, ya que los horarios d’atención son escasos. La única persona que finalmente atiende nun acredita dala capacitación pa ello y el protocolu d’actuación ye básicu ya incompletu.
Ante tou eso, dende la Plataforma Feminista d’Asturies afirmen sentise decepcionaes, engañaes y manipulaes. “Inoramos porqué se tomaron estes decisiones pa dexar inoperativu un serviciu que diba abondar en beneficiu de tol festival, y que podría ser un referente pal restu d’Asturies con una meyor xestión. Indínanos amás que nun se destinaren fondos a dotalu de conteníu y de personal, cuando l’añu pasáu la suvención pública foi de 30.000 euros”. Dende Asturies 8M reclamen “midíes reales, aplicaes con seriedá y eficacia, y non declaraciones ermes qu’engañen a la ciudadanía treslladando la falsa sensación de que se ta cumpliendo un compromisu contra la violencia sesual cuando nun ye cierto”.
Por tou ello, esta mañana acudieron a la Casa Conceyu de Xixón  pa presentar una denuncia oficial.

Nuria Prendes