L’asociación de pescadores AEMS-Ríos con Vida y la Coordinadora Ecoloxista solicitaron a la Confederación Hidrográfica del Cantábricu que se garren les midies necesaries pa prevenir afeiciones al ríu por cuenta les obres d’igua de la compuerta de la Central Hidroeléctrica de Priañes

Según los ecoloxistes y pescadores, xuníos nel so interés pol ríu y los sos habitantes, ye previsible l’afeición a les poblaciones de peces del Nalón al producise’l enturbiamientu  les agües na redolada de la obra (sistema Priañes-Furacón) asitiáu ente los conceyos d’Uviéu y Les Regueres.
La cota d’agua a la que pretende baxase el banzáu pa sustituyir les xuntes va traer una alteración nel normal fluxu de les agües, que va poder incluso invertise. La escala salmonera d’El Furacón nel ríu Nalón qu’evita la torga fluvial, podría quedar seca ya inútil pal remonte y baxada de truches y salmones.

La presa d’El Furacón retien les agües del ríu Nalón y tresvasales per aciu d’un túnel al so tributariu’l ríu Nora, siendo turbinaos dambos unos 2 km agües pabaxo na central de Priañes. Esta esplotación ye la entrada al cursu mediu y altu’l Nalón, hestóricamente’l meyor ríu salmoneru del país y perdíu mientres décades pa esta especie pola contaminación minera ya industrial.
Dende hai 20 años el Nalón tornó poblar les sos agües gracies a los saneamientos de les cuenques mineres. Esta presa ta dotada dende va dellos llustros d’una escala salmonera con capturaeru y observatoriu con una rampla de baxada de esguines nun puntu inmediatu axacente, que s’usa pal control y suministru de reproductores.
La clave del bon furrulamientu de la escala anicia na correcha xestión de la cota d’agua nel banzáu pa que furrulen, al empar, la escala pa los pexes que xuben y la rampla pa los esguines que baxen, cuestión bien importante pos nel tramu qu’hai hasta la central nun esiste más caudal que’l suministráu por esta rampla. D’ende la importancia del curiau nes obres que se planteguen y del conteníu d’estos allegamientos.

Tamién piden qu’han d’analizase los sedimentos reteníos na presa de Priañes pa determinar el so potencial contaminante y nel so casu, llevalos a depósitu autorizáu de borrafes antes de realizar cualisquier obra.

Nuria Prendes

This work is licensed under a Creative Commons Attribution 4.0 International License.