La principal importancia d’esti alcuentru reside en que nun se trata namás d’aldericar sobro la Oficialidá como una opción, sinon de valorar como va ser esa Oficialidá que ya se da por fecha y dar a conocer a la sociedá asturiana los beneficios de la mesma
Guei entama n’Uviéu el Seminariu “Oficialidá, el camín costitucional de futuru pal asturianu” nel que, demientres dos xornaes, profesionales ya expertos d’estremaos ámbetos fadrán un analís pormenorizáu de les razones, consecuencies y ventayes del reconocimientu llegal de los drechos llingüísticos de los asturianos.
El Seminariu, entamáu pola ONG Iniciativa pol Asturianu en colaboración cola Universidá d’Uviéu, y que va tener llugar nel Aula Magna de Edificiu Hestóricu de la Universidá, cuntará cola participación d’espertos de prestixu internacional reconocíu y bien conoceores de la realidá asturiana. Nelli espondránse dende estremaos puntos de vista profesionales y académicos les motivaciones, consecuencies y beneficios que va traer la inclusión del estatus d’oficialidá nel estatutu d’autonomía, baltando prexuicios y retrucando con argumentos razonaos a polémiques malintencionaes, apurriendo datos en positivu desconocios pa munchos asturianos.
La inauguración de los actos sedrá güei a les cuatro de la tardi, a cargu del rector de la Universidá d’Uviéu, Santiago García Granda, que yá amosó nos meses pasaos l’encontu de la Universidá a la oficialidá.
Redaición InfoAsturies
This work is licensed under a Creative Commons Attribution 4.0 International License.
