Esta tradicional mazcarada d’iviernu foi recuperada nel añu 2.014, tres de 70 años ensin cellebrase

Los personaxes de la mazcarada  son los recoyíos por un equipu d’investigación etnográfica de magar informantes de más d’ochenta años. Caún de los personaxes cumple un papel na mazcareda: les collories parexes de maragatos baillen, l’escobón, vistíu con un cucuruchu y enagües blanques y llevando un ramu de lloréu entruga si dan o non l’aguinaldu, el diablu, con una cornamenta de vaca na tiesta y un forcáu, y l’osu, vistíu con pieles d’oveya, col so amu prietu, que son los qu’asusten, el vieyu y la vieya que pare un páxaru, la cenicera,  un home vistíu de muyer con un sacu que va tirando ceniza, la dama ya’l caballeru, el cura, el gaiteru ya’l mélicu.

Una interesante procesión qu’esti domingu visitará les cases d’esta parroquia de Grau pidiendo l’aguilandu, fasta aportar a San Xuan, frente a la ilesia, pa facer la función, presllándose la folixa con una xinta popular.

Llucía F. Marqués

This work is licensed under a Creative Commons Attribution 4.0 International License.