La gaita punxo música en Roces (Xixón) a l’alcordanza del 44 aniversariu del golpe d’estáu chilenu
Un once de setiembre acababa en Chile’l suañu de llegar al socialismu pela vía democrática y pacífica. Col asesinatu de Salvador Allende y la posterior dictadura de Pinochet, los chilenos entraron nuna de les etapes más escures de la so hestoria.
N’Asturies recordóse esi día con una concentración na que s’homenaxó a ritmu de gaita al difuntu presidente. Nes intervenciones resaltáronse les semeyances ente los los preparativos de golpe contra Chile en 1.973 y lo que se ta viviendo agora contra Venezuela y tuvieron tamién una alcordanza pa les víctimes de los demás conflictos suramericanos:”La Paz en Colombia, que nun mos cueste la vida, el recordatoriu de Luciano Romero, asesináu tamién un 11-S y Santiago Maldonado, sumíu n’Arxentina cuando se solidarizaba cola comunidá mapuche”
Mentantu, en Santiago de Chile, 25 manifestantes deteníos foi’l saldu d’una marcha de miles de persones pa pidir xusticia ya’l fin de la impunidá nel 44 aniversariu del golpe d’Estáu de Pinochet, na que los manifestantes portaben semeyes coles cares de víctimes de la dictadura y pancartes con llemes contra la impunidá de los represores.
Llucía F. Marqués
This work is licensed under a Creative Commons Attribution 4.0 International License.
