¿Un Festival de Sidra n’Avilés?

  • 5 Setiembre, 2017
Festival Sidra

David Castañón – www.lesfartures.com – @lesfartures

Pasó’l branu y finó San Agustín. Avilés cada añu crez n’interés turísticu y enllénase de xente a ver lo guapa que quedó la Villa. Y presta a esgaya.

Tolos que crecimos nesta ciudá sabemos lo que ye aguantar que nos digan lo “feo que ye Avilés”, “lo que fedía” y lo “sucíu que taba too”, mientres yo miraba alredor y veía una ciudá guapa, con un cascu antigüu preciosu ya un potencial enorme pa medrar.

Ye verdá qu’ameyoró colos años, y qu’el Niemeyer (pesie a la corrupción) ayudó asoleyar Avilés nel mundiu. Tamién ye verdá que la xabaz reconversión industrial ta convirtiendo una ciudá que podía tenelo too, namás nuna ciudá de servicios.

Gastronómicamente, perdimos la nuesa Estrella Michelín, pero güei podemos xintar en grandes restoranes so la solombra de capielles del S.XIII, embaxu los soportales de Galiana o con vistes al Niemeyer pero en casi nenguna de les opciones podemos facelo con Sidra.

¿Ú la sidra n’Avilés? Cada vegada queden menos sidreríes onde tomar un culete, y los nuevos restoranes qu’abren namás s’alcuerden de los vinos (y casi nengún de los asturianos). Inda queda’l requexu de Villalegre, pero n’Avilés centro malapenes queden sidreríes.

Pues voi facer una propuesta, un Festival de Sidra n’Avilés. En viendo l’éxitu que tien el Festival de la Cerveza n’Avilés, onde 22 puestos ufren les meyores cerveces d’Asturies y del mundiu, fadría ún de sidra. Y equí vien l’alderique, nun quiero un festival onde pagues 3€ por un vasu cristal y bebes tolo que quieras, onde namás, de 20 palos, 5 tan bonos, 10 tan pa beber y 5 tan pa tirar. Nun voi criticar esos Festivales, cumplen la so función, pero ya que n’Avilés podemos beber les meyores cerveces del mundiu, nel Festival de Sidra d’Avilés quiero beber la meyor sidra del mundiu, y muncha d’ella, ye asturiana. Y amás completar con invitaos con sidra de calidá, ¿por qué non una sidra de xelu de Quebéc? ¿o una de fueu d’Alemaña?

Nun pagaría entrada pero sí un preciu popular por botella, ¿1€? ¿2€? O un pack por sesión de 10€. ¿Ónde se vio un Festival d’albariño, rioja o cerveza cola bébora de baldre? Tamos falando de dignificar el productu, y pa eso hai qu’ufrir lo meyor de lo meyor, pero tamién hai que pagalo. Y esi preciu aínda sigue siendo baratu.

Yá un estra por tomar espresiones estremaes de la sidra natural, sidra brut, sidra de xelu, sidra rosada, sidra de mesa, sidra de pera … asturiana o d’otres partes del mundiu. Si pagamos 2€-3€ por beber una caña de cerveza nun vasu plásticu, paguemos lo mesmu (o más) por una sidra de xelu con 3 años de procesu n’ún de cristal (y esto sí que ye innegociable, la sidra nun se pue beber en vasu de plásticu).

Dignificar la sidra, facer un Festival cimeru nel mundu al rodiu la sidra, con conferencies, con amueses, con concursu oficial d’echao, con Avilés como capital mundial sidrera, y en plenu branu, cuando la ciudá ta enllena turistes. ¿Por qué non?

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies