L’asociación reclama al PP que dea exemplu de la so pidición continuada de más llibertá d’eleición pa les families nel sistema educativu, retirando la demanda presentada nel Tribunal Superior de Xusticia d’Asturies (TSXA) contra’l plan pilotu pa incluyir l’asturianu como llingua vehicular una hora a la selmana

Esti  plan, que tanto Iniciativa pol Asturianu comu’l restu d’asociaciones, partíos, sindicatos y organizaciones que defenden l’asturianu alcuentren insuficiente dafechu, tantu n’hores como conteníos, tien l’absoluta garantía de llibertá, tanto pal alumnáu y les families, como pal profesoráu y los centros, que s’apunten, toos ellos de forma voluntaria a participar nel mesmu. Les families que quieran llevar a los sos fíos y fíes a una hora a la selmana de clases impartíes n’asturianu, nes qu’amás, van dase tamién los conteníos en castellán, tendrán de pasar por abegosos trámites anantes de ser quién a cumplir los requisitos desixíos nesti plan, ensin falta de que’l PP presente demanda xudicial escontra’l mesmu.

La refuga a esti plan choca col enfotu del PP n’introducir la obligatoriedá de los planes de billingüismu col inglés, siendo qu’esta llingua tampoco nun ye oficial n’Asturies.

Dende Iniciativa  pol Asturianu llancen al PP d’Asturies la retórica entruga de si lo que quier ye que l’asturianu desapaeza nes prósimes xeneraciones y apunten a Mercedes Fernández “Cherines” como responsable direuta d’esti ataque “Que nun respuende a les opiniones que mos lleguen de les bases del PP y d’otros munchos dirixentes del partíu, que nun entienden estes posiciones agresives contra l’asturianu, que namás lleven al PP a una postura marxinal y antidemocrática.”

Redaición  InfoAsturies

This work is licensed under a Creative Commons Attribution 4.0 International License.