Como ca branu, el Serviciu de Salú del “Principado” ordena’l preslle de plantes nos hospitales asturianos, independientemente de los miles de pacientes qu’esperen turnu pa ser atendíos y/o interveníos, munchos con esperes de más de mediu año, nun procesu que favorez la privatización pali que pali del sistema sanitariu
Dica cuasi finales de setiembre permanecerán presllaes cerca de 300 cames nos hospitales asturianos, repartíes pente l’Hospital Universitariu Central d’Asturies (HUCA), el San Agustín, la Cadellada, Xarrio, Alvarez Buylla, y l’Hospital de Cagüeñes.
Según la información que remanen les centrales sindicales de CC OO, Sicepa y CSI, namás los hospitales de Cangas del Narcea y Les Arriondes nun amenorgarán la so capacidá-. Entantu, son munchos los miles d’asturianos n’espera de ser atendíos. El resultáu a mediu plazu ye una deriva de los pacientes dende’l serviciu públicu a la melecina privao.
Demientres cerca tres meses nel Hospital Universitariu Central d’Asturies (HUCA) quedarán inabilitaes 80 cames, pesia qu’acordies los caberos datos, en mayu había 5.507 pacientes esperando’l so turnu pa ser atendíes nes istalaciones del HUCA, l’únicu centru sanitariu del SESPA con demores perriba de los seyes meses, tando 182 pacientes nesta situación.
Nel Hospital de Cagüeñes trenta cames presllaron yá a entamos de xunu y otres trenta en xunetu. Arriendes d’ello nesti centru tamién hai noticia de l’anulación de consultes de delles especialidaes a lo llargo’l branu.
Nel San Agustín, n’Avilés sedrán en total 65 cames, 30 en Mieres -a les qu’habría qu’amestar les de la planta que se caltién presllada dende’l so treslláu al so nuéu allugamientu-; Llangréu, otres 30, y Xarrio, 24. En total, el SESPA disminuirá el so llabor quirúrxicu y asistencial col preslle de 290 cames en seyes de los sos ocho hospitales. Pero en branu non solo se trata de plantes presllaes y cames fuera serviciu, sinón tamién de consultes qu’amengüen los sos díis d’atención ya’l so volume avezáu de cites.
Los sindicatos dicen que se trata de «un plan economicista que namás busca aforrar perres» acusándolos de tratar d’aforrase la contratación de personal pa sustituciones por vacaciones. Andecha Astur va un pasu más allá y acusa al “Principado” de tar llevando a cabu un procesu encubiertu de privatización. Mientres el serviciu públicu se reduz drásticamente, los hospitales de capital priváu nun amenorguen les sos cames nin les sos consultes demientres el periodu estival, de manera que son asgaya los pacientes que, pudiendo ser atendíos con medios públicos tienen de treslladase a los privaos.
Llucía F. Marqués
This work is licensed under a Creative Commons Attribution 4.0 International License.
