Acordies l’informe del Foru Parlamentariu Europeu pa la Población y el Desendolcu, nos países onde los métodos anticonceptivos son más acesibles pa la población la tasa d’embarazos non deseyaos ya interrupciones voluntaries d’embarazu ye menor

El Parlamentu Européu pa la Población ya’l Desendolcu (EPF), organización qu’acomuña a diputaos de toa Europa nel so enfotu por asegurar la salú sesual y reproductiva de los ciudadanos, revela que nos encontramos pente los llugares de la UE  nos que más abegoso, arriendes de más caro,  ye l’acesu a los métodos anticonceutivos, lo que ye nidio que ta direutamente relacionao col eleváu númberu d’embarazos non deseyaos.

La investigación, qu’estudió la cuestión en 45 países europeos, fai analís tanto del acesu a los estremaos métodos anticonceutivos como la facilidá para consiguir por víes publiques información relativa a los medios pa una eficiente planificación familiar. 

El Serviciu de salú del “Principado” financia esclusivamente cuatro métodos anticonceutivos el preservativu, que se reparte de baldre de manera esporádica a la mocedá en delles campañes, la píldora anticonceutiva -seique nenguna de les consideraes d’última xeneración- y dependiendo de los casos particulares de cada muyer, el DIU de cobre o l’emplante d’anticonceptivos nel brazu.

N’Asturies, la píldora del díe dempués, el parche o l’aniellu vaxinal nun tienen nengún tipu de sofitu económicu. Amás, el preciu de los métodos anticonceptivos, ya de por si alto, ta graváu con un 10% d’I.V.A, ya que extrañamente nun son consideraos bienes de primera necesidá.

Pa finar, los espertos alvierten de que ye necesaria una estratexa de Salú Sexual y Reproductiva que contribuya a finar con falsos mitos n’anticonceición, como la creencia xeneralizada de que la píldora ye nociva por llevar hormones, que puede causar cáncanu o que’l DIU ye un métodu que falla abondo y produz hemorraxes.

This work is licensed under a Creative Commons Attribution 4.0 International License.