El 3 de xunu PSOE, PP, Ciudadanos y UPN van movilizase escontra l’usu institucional de la ikurriña

Dende l’añu 2003 una Llei de Símbolos, aprobada entós nel Parllamentu de Navarra por una mayoría nacionalista española, prohibía l’usu de la ikurriña nos ayuntamientos navarros de mayoría nacionalista vasca.

El 30 de marzu, la nueva mayoría del Parllamentu de Navarra, conformada por Bildu, Geroa Bai, Podemos ya Izquierda-Ezkerra, non nacionalista vasca, pero tampoco identificada col modelu d’España del régime constitucional de 1978, decidió derogar aquella Llei.

La rempuesta de les fuercies polítiques identificaes col status quo foi convocar una manifestación de protesta, argumentando “defender la bandera de Navarra”, pal 3 de xunu en Iruñea, pues consideren l’usu de la ikurriña como una ofensa para la bandera de Navarra.

Los partíos políticos que constituyen l’actual Gobiernu de Navarra plantegaron hai díes presentar mociones nos ayuntamientos pa que’l 3 de xunu namás seya izada la bandera de Navarra.

Por embargu la reacción d’UPN consistió en afirmar que de nenguna manera puen dexar d’izarse les banderes del Reinu d’España y de la Unión Europea. Una vuelta más el nacionalismu español del réxime utiliza ellementos d’identidá llocalista na llínia d’un supuestu rexonalismu, esclusivamente folclorista, pa intentar bloquiar dende abaxu cualisquier marcu d’identidá territorial alternativu al status quo.

This work is licensed under a Creative Commons Attribution 4.0 International License.