La procesión más sidrera calez motores pa cellebrar un añu más el Vienres Santu más folixeru y asturianu, pero hai qu’andar sollertes: les places son llendaes

Redaición InfoAsturies

La revista LA SIDRA convoca un añu más a participar nel Sidracrucis, la tradicional procesión, que llevará a los sos participantes de chigre en chigre y de llagar en llagar nuna pelegrinación qu’esti añu visitará los conceyos de Xixón y Villaviciosa.

L’eventu entamará a les doce’l mediudíe, col culín inaugural y el repartu d’identificaciones, pa salir darréu siguiendo al gaiteru peles cais de la ciudá, y nun finará  dica la nueche, cuando los autobuses lleven a los pelegrinos de vuelta pa casa.

Pela mañana sedrán nueve los chigres xixoneses que recibirán la visita de la marcha sidrera: La Xuanina, La Montera Picona, El Requexu, el Llagar de Begoña, El Mariñán de Begoña, Los Campinos, El Texu, El Bon Yantar ya’l Puente Romano, anantes de desembocar nel Pueblu d’Asturies, onde se tará cellebrando la Primer Sidra l’Añu. Allí, amás de tastiar la Sidra más nuevo de tolos llagares asturianos, recibirán un “kit sidreru” gastronómicu.

Darréu, l’autobús de la sidra llevará a los esforciaos penitentes a Villaviciosa, onde podrán visitar una tonelería anantes de siguir tomando Sidra, esta vegada direutamente de los toneles de Buznego y Vallina.  L’itinerariu presllase, como nun podía ser d’otra mena, con una espicha  que se celebrará en Casa Pepito.

Tou ello –sidra, pinchos, kit sidreru, autobús, espicha, música’l país y tola Sidra que se seya quien a beber- tien un coste de 60 €, que baxa a 55 pa grupos de cinco o más presones y los autocares saldrán dende Xixón, Uviéu y Avilés.

Les persones interesaes pueden acutar plaza –son llendaes por motivos d’organización– pueden facelo nel teléfonu de contautu 652.594.983 o nel corréu electrónicu sidracrucis@lasidra.as.

This work is licensed under a Creative Commons Attribution 4.0 International License.