“El futuru d’Escocia tendría de tar nes manes d’Escocia”, afirmó Nicola Sturgeon

El parllamentu escocés aprobó esti martes una moción, promovida pola primer ministra, Nicola Sturgeon, del Partíu Nacionalista Escocés, que tresfier al Gobiernu autónomu un mandatu de negociar con Londres la celebración d’un nuevu referéndum sobre la independencia d’Escocia ente la seronda de 2018 y la primavera de 2019, enantes que’l Reinu Uníu abandone la Unión Europea.

La iniciativa cunta cola oposición del Gobiernu británicu, contrariu a la celebración de la consulta a lo menos mientres tean en cursu les negociaciones sobre’l Brexit. Por embargu, Sturgeon plantega que’l pueblu escoces tien de tener la oportunidá de votar sobre’l so futuru precisamente enantes que Gran Bretaña abandone la Unión Europea.

Por 69 votos a favor y 59 en contra, la cámara parllamentaria de Edimburgo sofitó la propuesta. A favor votaron los diputaos del Partíu Nacionalista Escocés (63) y del Partíu Verde Escocés (6), en contra, los diputaos de los partíos conservador (31), lliberal (5), y llaborista (23).

This work is licensed under a Creative Commons Attribution 4.0 International License.