David Castañón – www.lesfartures.com – @lesfartures
Dicíanos Ramón Huidobro, direutor xeneral de la DOP Rías Baixas, que l’oxetivu principal d’una DOP ye la recuperación yá’l desenvolvimientu de les zones rurales ufiertando un productu calidable diferenciador de cada zona xeográfica.
LA DOP Rías Baixas ufiertónos una comida de trabayu a medios de comunicación asturianos, xustu antes de celebrar el so Salón del Vinu DOP Rías Baixas pa profesionales yá hosteleros. A la comida, amás de Ramón Huidobro, allegó’l Presidente de la DOP Juán Gil, la direutora de marketing Eva Mínguez, l’enólogu Fernando Vilariño y la direutora de comunicación Loreto Vázquez.
Mientres un par d’hores, pudimos entrugar, intercambiar paeceres y falar sobre la situación xeneral del vinu, de la sidra y, sobre manera, del albariño. Una DOP que costó entamar, con muncho productor caseru y amiestu d’uves “más granibles”, pero que col llabor de los primeros bodegueros y, tamién científicos asturianos como María del Carmen Rodríguez Martínez, que depuraron y llantaron les viñes de meyor calidá tres años d’investigación, consiguieron ún de los meyores vinos blancos del mundu.
Anguaño la DOP Rías Baixas tien una presencia enorme n’Asturies, pudiendo atopar un albariño en casi cualquier restorán asturianu. Y supón un estímulu, una referencia yá un camín a siguir, la defensa, el ciñu y la llucha que fai’l consumidor gallegu pol productu de la so tierra. Un gallegu consume agua gallego y vinu gallego, daqué que nun faemos los asturianos. Ello ye que ye muncho más fácil consumir vinu albariño n’Asturies que vinu asturianu.
Tres la comida, celebróse’l Salón del Vinu DOP Rías Baixas. cola presencia de 24 bodegues y 91 vinos nun céntricu hotel de Xixón. Un salón destináu a profesionales y prensa onde pudimos probar albariños conocíos, desconocíos, bodegues grandes, pequeñes; y pequeñes xoyes desconocíes en forma d’albariño brut nature o albariño tintu.
Como veis, los “grandes” vienen, visítennos, arremánguense y esplíquennos qué faen y por qué la so botella de vinu cuesta’l preciu que cuesta. Espero que nos sirva d’exemplu y camín a siguir.
This work is licensed under a Creative Commons Attribution 4.0 International License.
