Mocedá y muyeres, los peor pagaos d’Asturies.

  • 20 Marzo, 2017

Los trabayaores que tienen pente 18 y 34 años cobren n’Asturies una media del  51%menos que la xeneración anterior; les muyeres, alrodiu’l 27% menos que los homes. Ser moza n’Asturies ye, casu de tener trabayu, garantía de discriminación salarial.

Llucía Fernández Marqués

Nun va tantu que la miseria/riqueza’l país podía albidrase poles cifres del paru, cola premisa más o menos cierta de que con trabayu tinía ún más o menos asegurao el vivir, sinón sobráu, a lo menos con una cierta dignidá. Los contratos precarios, la inestabilidá llaboral, la cayía de los salarios y de les condiciones de trabayu foron camudando esto y agora nun ye d’estrañar que se caltenga ún na llende mesma de la probitú mesmo trabayando ocho hores al díi con contratu llegal.

Les xeneraciones recién incorporaes al mundiu llaboral alcuéntrense con que cobren menos de la metá que los sos pás: una media de 860 €, frente a los 1.685 € qu’algamen de media los trabayaores de 35 años p’arriba. Si baxamos a los menores de 25, el salariu entama a ser escandalosamente ridículu: 498 €.

Esto ya sedría de por si llacerioso si camentáramos que la mocedá tendría d’esperar a los 35 años pa cuntar con un salariu medianamente decente, pero la evolución de les cifres dan a entender que nun va ser asina. Cenciellamente, la xeneración qu’acarreta con un 50% de paru y que considera mil euros un sueldu pocu menos qu’imposible tien poques vistes de meyorar la so situación: la franxa d’edá na que s’afaya’l salariu más probe evoluciona con ellos, algamando pali que pali mayores estayes d’edá.

Les muyeres y los  emplegaos con discapacidá son los perxudicaos pente los perxudicaos. Les primeres pierden cerca del 30% del so salariu en comparanza colos mesmos puestos pa homes, demientres que los segundos cobren de media un 17,1% menos. Una muyer menor de 35 años con dalguna discapacidá tienlo nidiamente complicao pa llevar una vida económicamente independiente.

Delantre d’esta falta de perspeutives nun ye d’estrañar la mortal perda de mocedá (cualificada y non) que carez el país, daqué qu’Arturu Xosé Bermeyu, Secretariu Xeneral d’Andecha Astur, señala como xenocidiu indireutu “La mocedá asturiano que resiste a la emigración forciao alcuéntrase ente la precariedá y la miseria nos sueldos. Camín del xenocidiu o como queráis llamalo”.

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies