Según el Certame más importante de quesos del mundu, que de normal celébrase en Llondres, y nel caberu Ochobre fízose por primer vegada en Donosti, el nuesu quesu Cabrales más conocíu, El Teyedu, de Pepe Bada, ye’l meyor quesu azul del mundu
www.lesfartures.com
Los World Cheese Awards dexáronnos dellos premios a quesos asturianos, al Cabrales Vega de Tordín y a los Besos del Rey Silo, pero foi Pepe Bada col so Teyedu quien llogró la medaya SuperGold, qu’entrega’l premiu al meyor quesu azul del mundu.
Yá conocemos dende cuantayá’l llabor descomanáu de Pepe yá’l so equipu, poniendo Teyedu y Asturies nel mundu, y calteniendo’l métodu tradicional d’ellaboración del so quesu, con muncho curiáu yá mimu. Pero tamién con muncho trabayu al llombu, lliteral, porque’l 4×4 llega hasta onde llega yá’l camín hasta la Cueva inda hai que facelo a pie col quesu a recostrines.
Amás d’esti duru trabayu, Pepe reclama más sofitu institucional. Cuntanos con enveya cómo otros territorios, amás de sovenciones, cunten con servicios de promoción y traductores en certames internacionales (como esti de Donosti) y qu’el nuesu Principáu desenténdese dafechu.
Por mor d’esti Premiu, acaben de sacar a la venta la edición especial con namás 250 exemplares de la tirada que ganó’l Premiu a Meyor Quesu Azul del Mundu, un quesu con una maduración de 7 meses nuna cueva los Picos d’Europa, más artesanu imposible, pieza a pieza.
P’acompañalu, Sidra Diamantes de Hielo de Viuda de Angelón. Perfeuta con quesos, y más con esti Cabrales tan elegante. Llimpia la boca, y nun rila con un quesu tan fuerte. Una sidra de xelu de 11,5% , con un procesu d’ellaboración llaboriosu (pa consiguir una botella de 37,5cl precísase l’equivaliente a 10 botelles de sidra natural). Con un zucre residual de 140g/l, una llambionada, que güel y sabe a fruta maduro pero que nun repuna. Perfeuta y qu’algamó nel 2016 el premiu a la segunda meyor sidra de xelu del mundu nel concursu de Michigan (EEXX).
This work is licensed under a Creative Commons Attribution 4.0 International License.
