La escombrera de mina Tres Hermanos en Pilotuerto lleva amburando dende avientu del 2015

La Coordinadora Ecoloxista d’Asturies  denuncia ante la Direción Xeneral de Minería y Enerxía y ante la Dirección Xeneral de Prevención y Control Ambiental del Principáu que la escombrera lleva un añu y tres meses amburando ininterrumpidamente nes cercaníes del pueblu de La Pruhida, conceyu de Tinéu, ensin que nin la empresa nin el Principáu tomaren nengún tipu de midíes p’apagalo.

El dañu ambiental rescampla, yá que nun se trata solo d’una quema, sinón de la quema de material altamente contaminante, pero amás ye un riesgu porque esti tipu de quemes provoquen cambeos nes  condiciones d’estabilidá de les escombreres, pudiendo dar llugar a esbarrumbamientos parciales dientro de les mines axacentes.

Demientres la combustión del material de la escombrera producense gases con un altu conteníu en CO y SH, altamente nocivos pa la salú, tantu humana como del restu de seres vivos de la fastera. Amás de la contaminación química del aire esiste una contaminación visual típica de les quemes d’estes escombreres que s’aprecia dende decenes de kilómetros.

Escontra los procesos de combustión espontanea ye preciso tomar midíes preventives y correutives que, como denuncia la C.E.A, equí nin se tomaron, nin hai constancia de que se vaigan a tomar, col consiguiente perxuiciu de los vecinos de la zona y de la calidá ambiental asturiana polo xeneral.

This work is licensed under a Creative Commons Attribution 4.0 International License.