El movimientu demuéstrase andando, y el compromisu, actuando. Los mozos de Ll.E.A asina lo entienden y, ante una necesidá evidente nel sistema educativu d’anguañu, como ye la necesidá de sofitu estraescolar pa munchos alumnos, y ante una situación económica que quita a munches families de la posibilidá de pagar estes clases, reacionaron creando un serviciu de clases particulares de baldre, qu’ellos mesmos imparten.

“El proyeutu de les clases de sofitu empezó como iniciativa de la RSP de Xixón (Rede de Solidaridá Popular)” desplícanos Tomás Darío Albarenque Malnero, responsable de les clases por parte de Ll.E.A “y, como yá teníemos collaboraciones anteriores, como una recoyida de material escolar, convidáronnos a que sía un proyeutu conxuntu yá que dende Ll.E.A (Llibertá Estudiantil Asturiana) intentamos dar sofitu a los estudiantes en tou lo que podamos”

Tomás Darío tienlo bien claro: la necesidá d’unes clases de sofitu naz d’un fallu del sistema educativu bien importante, que ye la falta d’adautación a los alumnos “Nun combaten lo suficiente la desmotivación de los estudiantes, xenerada por diversu factores del so ambiente diariu, hai que devolver les ganes d’estudiar a esos escolinos que les perdieron y dexar de sistematizar la educación con fines claramente económicos”

Enagora tán dando clases nel Polígonu de Pumarín, pero entá nun tienen alumnáu abondo, queda enforma espaciu nes sos aules pa quien quieran participar d’esti interesante proyeutu.

This work is licensed under a Creative Commons Attribution 4.0 International License.