Tres de cuatro años ufriendo un espaciu abiertu a la cultura, La Manzorga ve la so continuidá menaciada

El Centru cultural la Manzorga, qu’abría les sos puertes na cai Carmen de Xixón nel añu 2.013, pa llueu treslladase por motivos d’espaciu al so  actual allugamientu na cai Ceán Bermudez, tuvo dende l’entamu vocación de llocal públicu, tal como se desprende de la so propia descripción: “ Defínese como proyeutu asociativu, coleutivu y autoxestionáu qu’abellugará cualisquier iniciativa popular –cultural o política- y sobre too abierta a la participación de la xestión del espaciu.”

A lo llargo d’estos cuatro años foron amestándose socios al grupu  anicial de fundaores, y  xuntos entamaron alderiques, esposiciones artístiques, conciertos, proyeciones, presentaciones de llibros, actuaciones teatrales…  podría decise que cumplieron sobradamente col so envís de ser un espaciu abiertu onde dar cabida a les inquietudes y l’arte de los xixoneses.

Sicasí, paez que los ingresos –algamaos fasta agora d’ aportaciones voluntaries, venta de llibros y los beneficios de la barra del llocal- nun son abondos pa caltener en pie esti proyeuto; reconocen que “Nun algamamos el nuesu oxetivu  de caltenibilidá y les fuercies necesaries van esgotándose” polo que los miembros de La Manzorga entamen una campaña de captación d’Amig@s de La Manzorga y convoquen a un conceyu abiertu a quien quiera participar p’alcontrar solución a los sos problemes.

El conceyu tendrá llugar nel mesmu Centru Cultural la Manzorga’l martes 21 de febreru a les siete de la tarde.

This work is licensed under a Creative Commons Attribution 4.0 International License.