La cocina asturiana sigue ganando fama pel mundiu. Amás d’afitar los grandes cocineros que tenemos, el mundiu entama conocer otros que nós ya conocemos y esfrutamos dende cuantayá. Y eso ye siempres bona señal.
David Castañón, www.lesfartures.com
Esta vegada foi en Madrid Fusión onde tuvimos pendientes del Concursu al Cocineru Revelación 2017. Pedro Noriega “Pello”, taba nomináu a un concursu pel que ya pasaren otros años Ricardo Gonzáles Sostres (El Retiro, Estrella Michelín) o Diego Fernández (El Regueiro, nun tien la Estrella, pero debería).
Quedamos terceros (anque primeros nes redes sociales), y tampoco pudo ser nel Concursu a Meyor Croqueta del Mundiu, pero da igual, l’oxetivu yera poner Celoriu nel mapa y qu’el mundiu conoza esa ayalga a la parrilla que tenemos col Castru Gaiteru.
Lleven dende Abril de 2014, nun sitiu perguapu y afayadizu, y que poco a poco Pedro y Marisa (so muyer, al cargu la sala) van poniendo a gustu. Amás de les croquetes; muncha parrilla, tanto nos pexes como nes carnes. Y un puntu de cocina creativa perguapu. Con productu de calidá, y tirando siempre d’Asturies.
Anque lo meyor ye que vayas, te dexes allumar pol Castru Gaiteru y esfrutes.
This work is licensed under a Creative Commons Attribution 4.0 International License.
