Ún de cada tres casos n´Asturies recuéyese en conceyu de Xixón

Coscientes de la gravedá del problema, cuyu algame trespasa les puertes de los cientros escolares, l´AMPA del I.E.S. Emilio Alarcos ta ufriendo un ciclu de charres  col envís de prevenir, deteutar y actuar ante l´acosu escolar complementariu a la implantación del programa TEI (tutoría pente iguales) que ya furrula nel istitutu.

El ciclu costa de tres charres enfocaes a l’actuación por parte de les families, nes que s´aborda’l problema dende tres puntos de vista estremaos: el de les víctimes, el de los acosaores y el de los escolinos que, ensin ser acosaos nin violentos, son testigos de les agresiones. Ana Fernández, la sicóloga encargada de dar estes charres, señala que son precisamente estos caberos una de les pieces clave pa camudar la cadarma que permite que se caltenga l´acosu.

Seique esti cientru en concreto nun tien recoyíes denuncies, les mas y plas son coscientes de la importancia de tar sollertes y saber como actuar en casu de detectar les señales que delaten la esistencia d’esti problema que, siendo grave en tol país, empeora enforma en Xixón, siendo nesti conceyu nel que se recueyen un de cada tres casos de los conocíos n’Asturies, con 19 denuncies de les 60 que se tramitaron l´añu pasáu. El númberu de casos xorrez cada añu y afeuta más a les neñes.  La mengua de presonal nos  cientros educativos nun fai sinón dificultar la toma de midíes escontra esta llaceria.

Cabe resaltar que de cada diez  casos d´acosu escolar que se dan n´Asturies, namás dos se rexistren en cientros públicos, correspondiendo la gran mayoría a cientros concertaos.

This work is licensed under a Creative Commons Attribution 4.0 International License.