Les candidatures a los premios «Jugamos por la igualdad. No al machismo» siguen abiertes hasta’l vienres 13 de payares. La convocatoria de 2026 dispón de 30.000 euros pa reconocer trayectories y proyectos que contribuyan a eliminar les barreres de xéneru nel deporte.
La Conseyería de Cultura, Política Llingüística y Deporte busca dar visibilidá al trabayu de persones, clubes y entidaes pola igualdá d’oportunidaes. La convocatoria recueye cinco modalidaes:
- Deporte base: pa clubes con equipos en categoríes inferiores.
- Trayectoria: reconocerá a tres deportistes, una entrenadora y una árbitra.
- Conciliación: iniciatives que faciliten la práctica deportiva de les muyeres.
- Estratexa pola igualdá: equiparación de recursos y condiciones.
- Difusión: promoción y visibilidá del deporte femenín.
Cómo presentar una candidatura
Cualquier persona o entidá pue promover una propuesta, pero la presentación formal tien de facese al traviés de los vocales del Conseyu Asesor de l’Actividá Física y el Deporte. Ye necesario contar cola aceptación de la persona o entidá propuesta y apurrir una memoria breve. Cada candidatura namái pue concurrir a una categoría.
Los modelos y la información de la convocatoria tán disponibles nel portal de Deporte d’Asturies. El conseyu asesor escoyerá un máximu de tres finalistes por categoría y la Comisión de Deporte y Muyer actuará como xuráu.
La información de la convocatoria pue consultase tamién en Pinceladas de Asturias y El Búscolu.
Más información sobre igualdá n’InfoAsturies
- Avilés acueye un congresu sobre violencia vicaria y machista.
- Una cooperativa de muyeres pa impulsar l’empléu rural nel Valledor.
- Xixón abre l’alderique sobre la desigualdá na industria musical.
- Les mas curiadores reclamen derechos llaborales y ayudes dignes.
- La entrada en vigor de la Llei LGTBI d’Asturies y los derechos que recueye.
Semeya d’archivu d’InfoAsturies: plantía del Sporting Femenín.
This work is licensed under a Creative Commons Attribution 4.0 International License.
