Opinión: Llucía Fernández Marqués
Güei voi escribir una noticia que nun lo ye.
Esta nueche la mio fía pasóla nel hospital. Non, nun vos esmolezais, nun-y pasa na. Pasó la nueche acompañando a una collacia: una rapacina de 21 años, preñada, a términu, enferma ya ensin medios. El padre de la criatura dexóla tirada nel primer mes d’embarazu, dempués d’una paliza que yá entós la llevó al hospital. Quería «saca-y el guah.e a golpes».
Como decía, nun pasa na. Nun ye noticia. Pasa tolos díes.
Entantu escribía, va unos minutos, saltóme una notificación: una muyer asesinada en Carabanchel, ayeri. Otra. Vaya, menos mal, foi lloñe -sarcasmu modu on- N’Asturies tamos de norabona, nun mataron esti añu más qu’a dos, a una la pareya, a otra l’hermanu; taremos contentos.
Comu dixo Carme Pérez, d’Andecha Astur, na so cabera intervención na concentración que mensualmente se fae contra les violencies machistes delantre la Gota Llechi, en Xixón -que por ciertu, nun cuenta con más cobertura mediática qu’esti humilde noticieru-, si les víctimes compartieren cualquier otra característica -profesión, raza, orientación sesual, tendencia política…- que nun fuere’l fechu de ser muyeres, una acumulación asemeyada d’asesinatos provocaría una alarma social inmediata. Sicasí, cuando se fala de violencia machista, les cifres pasen per delantre de la sociedá como si fueren inevitables.
Fuera d’equí tampoco pasa na. 150 muyeres al día son asesinaes pola so pareya u homes familiares nel mundiu. Más de 54.000 contabilizaes oficialmente al añu. Estímase que 840 millones de muyeres -una de cada tres- reconocen carecer violencia física o sexual a lo llargo de la vida. Digo reconocer porque yo, personalmente, creo conocer namás una muyer mayor de 15 años qu’afirme que nun viviere una situación de violencia, ya seya física o sexual, pero que denunciaren conozo bien poques.
Y digo yo: ¿tenemos les muyeres que mirar con calma cómo nos siguen matando? Matando, violando, golpeando, acosando, abusando, ignorando. ¿Tenemos que seguir esperando a ser otra notificación nel móvil?
Esta nueche, la mio fía acompañó a una amiga nel hospital. El so casu nun va entrar nos archivos de violencia. Güei escribo una noticia que nun lo ye. Porque pasa tolos díes.
This work is licensed under a Creative Commons Attribution 4.0 International License.
