Asturies Antifacista convoca una concentración esti miércoles 21 d’ochobre, a les 18:30 nel Parche d’Avilés, pa espresar el refugu a la visita del presidente de Vox baxo’l lema «Paremos los pies al facismu».
La visita de Santiago Abascal a Avilés va atopar una respuesta na cai. Asturies Antifacista llama a concentrase na plaza del Conceyu esti miércoles, nuna movilización que busca facer visible la oposición a la presencia del dirixente de la ultradrecha na ciudá.
El presidente de Vox tien prevista la so intervención a les 19:00 na plaza de Camposagrado, media hora dempués del entamu de la concentración antifacista. Los dos actos tán convocaos en places distintes del cascu históricu avilesín.
La convocatoria llega nun contestu nel que la respuesta al racismu y a la ultradrecha yá llevó a cientos de persones a les cais asturianes. N’agostu, una movilización d’Asturies Antifacista nel barriu de La Florida, n’Uviéu, defendió l’acoyida de menores migrantes frente al refugu d’un sector del vecindariu. Aquella protesta xunió la reivindicación de servicios públicos cola defensa de la convivencia, la solidaridá y los drechos de los menores.
Vox tuvo una presencia activa na oposición a esi recursu de protección. Les sos portavoces nel Conceyu d’Uviéu y na Xunta Xeneral acompañaron una protesta vecinal contra’l centru delantre de la sede de Presidencia.
En setiembre, Rubén Rosón y Jorge Fernández, miembros d’AMA Asturies, sufrieron una agresión facista durante les fiestes de San Matéu, dempués de que unos mozos intentaren vandalizar la caseta na que collaboraben, adornada con una pancarta antirracista y una bandera LGTBI. La paliza provocó una respuesta social que llevó a 2.500 persones a concentrase contra la violencia ultra delantre del Conceyu d’Uviéu’l 19 de setiembre.
Más recientemente, la violencia ultradrechista algamó a la acampada pola vivienda de La Escandalera. El 5 d’ochobre pasaron a disposición xudicial cuatro persones deteníes como presuntes responsables d’una agresión que dexó a un acampáu con firíes na cara. La investigación policial atribuyó a los fechos una motivación ideolóxica y d’odiu y identificó xestos y proclames d’exaltación nazi.
Dos de les persones deteníes tuvieren venceyaes a Vox. La formación reconoció esa vinculación anterior, anque aseguró que dexaren de militar nel partíu en xunu pola so relación con Núcleo Nacional.
La respuesta institucional tamién provocó enfrentamientu políticu: PP, Vox y la conceyala non adscrita tumbaron n’Uviéu una condena de los ataques de calter políticu, nun alderique nel que se citaron tanto l’agresión de San Matéu como les intimidaciones contra la acampada.
La respuesta na cai a les visites de Vox tien precedentes n’Asturies y n’otros territorios. El 11 d’abril de 2019, estudiantes del campus del Milán de la Universidá d’Uviéu concentráronse contra una mesa informativa de la formación. Los integrantes de Vox acabaron recoyendo’l material y abandonando’l llugar ente consignes antifacistes.
Agora, Avilés va ser el nuevu escenariu d’esa respuesta social. Frente al espaciu públicu que busca ocupar Vox cola visita del so presidente, la convocatoria antifacista propón facer visible una Asturies que refuga la normalización de la ultradrecha española.
La cita ye esti miércoles 21 d’ochobre, a les 18:30, nel Parche d’Avilés.
This work is licensed under a Creative Commons Attribution 4.0 International License.
