La protesta instalada na plaza de La Escandalera reclama parar los desfiucios, garantizar l’accesu a la vivienda y avanzar hacia una movilización más amplia. La so primer nueche quedó marcada pola denuncia d’una agresión atribuida a un grupu d’estrema drecha española, pola que fueron deteníes posteriormente tres persones. L’episodiu llega menos d’un mes dempués de la paliza sufrida por dos integrantes d’AMA Asturies nes fiestes de San Matéu y d’otros incidentes denunciaos en Xixón, Llanera y Castrillón.

L’acampada pola vivienda instalada na plaza de La Escandalera d’Uviéu empezó la so primer nueche marcada non solo poles reivindicaciones sociales que llevaron a cientos de persones al centru de la capital, sinón tamién por un nuevu episodiu de violencia.

Según relataron representantes de los colectivos convocaos, un grupu de persones presentóse de madrugada na plaza profiriendo insultos, faciendo’l saludu nazi y provocando a los acampaos. Los participantes activaron entós el so protocolu de defensa pacífica, pero la situación acabó derivando nuna agresión.

«Vinieron provocando, faciendo el saludu nazi. Activamos el protocolo de defensa pacífica. Pusiéronse violentos y un d’ellos dió-y un puñetazo a un compañeru nuestru y le reventó-y les ñarres», explicó Andrés García, portavoz del Sindicatu d’Inquilines d’Asturies.

Según la versión de los acampaos, ún de los agresores dio un puñetazu nes ñarres a un participante, que quedó sangrando, y produxéronse tamién daños nun teléfonu móvil. La Policía Nacional nun intervino pa frenar al grupu facista pero apaeció nel llugar tres l’incidente, xusto a tiempu d’escoltar a los agresores fuera de la plaza darréu el puñetazu. Hores depués fueron deteníes tres persones venceyaes, según les informaciones conocíes, a movimientos d’estrema drecha..

L’acampada entamó tres una concentración celebrada esti vienres y va caltenese, polo menos, hasta’l manifestamientu previstu esti domingu 4 d’ochobre. El Sindicatu de Vivienda d’Asturies reclama la paralización de los desfiucios de toa triba, mientres el Sindicatu d’Inquilines ya Inquilinos plantega dar continuidá a la movilización y avanzar hacia una posible fuelga xeneral pola vivienda.

La protesta produzse tres el refugu nel Congresu de dos decretos estatales de vivienda. Los colectivos consideraben que les midíes yeren insuficientes, pero sostienen que la so cayida aumenta la inseguridá de miles de persones sometíes a contratos precarios, xubíes del alquiler o procesos de desallugu. Según los propios manifestantes, la cifra de persones potencialmente afectaes n’Asturies ronda les 90.000.

Pero les reivindicaciones van bastante más allá d’esos decretos. La movilización pon enriba de la mesa los precios del alquiler y de compra, los desfiucios, la vivienda vacía, la presión de los usos turísticos y la escasez de parque públicu. La reivindicación de fondu, resumida esti sábadu por una participante de la Coordinadora Xuvenil Socialista, ye que la vivienda dexe de tratase fundamentalmente como un bien de mercáu.

L’agresión denunciada na Escandalera llega trés selmanes dempués d’un sucesu de mayor gravedá. Dos integrantes d’AMA Asturies, Rubén Rosón y Jorge Fernández, fueron agredíos nes fiestes de San Matéu cuando intentaben impedir que un grupu arrancara un faldón arcuíris d’una caseta na plaza de la Catedral. Los dos precisaron atención hospitalaria y ún d’ellos puntos de sutura.

A finales de setiembre, la Policía Nacional identificara a seis mozos como presuntos autores y atribuyía-yos un posible delitu d’odiu al considerar que l’ataque pudo tener motivación homófoba. Rosón y Fernández atribuyeron públicamente l’agresión a un «grupu d’ultradrecha» y denunciaron que, mientres la paliza, profiriéronse insultos como «rojos de mierda» y «maricones» y «Arriba España».

El casu provocó una concentración de refuga n’Uviéu y pidiciones sindicales pa reforciar la seguridá y investigar la posible motivación ideolóxica de los ataques.

Tampoco ye l’únicu episodiu reciente d’intimidación política denunciáu n’Asturies. El 22 de setiembre celebróse en Xixón una concentración énte’l Palaciu de Xusticia en sofitu d’una integrante del Sindicatu d’Estudiantes y Llibres y Combatives que denunciara menacies recibíes nuna movilización feminista.

En Posada de Llanera, cuatro muyeres denunciaron igualmente ser increpaes por un home que fixo xestos obscenos y acabó insultándoles al glayíu de «comunistes». Una de les afectaes yera Candela Guerrero, responsable de Mar de Violetas.

A estos casos sumóse en setiembre la investigación de l’agresión sufrida meses antes por una muyer trans en Piedres Blanques, pola que fueron deteníos cinco homes d’entre 18 y 20 años. Según la información espublizada, la investigación apuntaba a una agresión preparada con insultos tránsfobos y menacies de muerte y venceyaba a los sospechosos con ambientes d’ultraderecha.

La denuncia y les detenciones d’esta madrugada coloquen asina la acampada nuna doble dimensión. Per un llau, ye una movilización que busca convertir la crisis de vivienda nun conflictu políticu y social visible, con asamblees, asesoríes colectives, talleres y coordinación con sindicatos. Per otru, los participantes vense obligaos a dedicar parte de los sos esfuerzos a garantizar la seguridá frente a posibles actos d’intimidación.

La movilización va tener continuidá esti domingu, cuando ta convocau un manifestamientu que va salir a les 12:00 hores de la Estación del Norte d’Uviéu. Los colectivos quieren que la protesta nun quede reducida a una fin de selmana y planteguen reforciar nos próximos meses la organización en defensa del drechu a la vivienda.

Lo que pase d’equí p’alantre va depender tanto de la capacidá de los movimientos de vivienda pa caltener la movilización como de la respuesta institucional a les sos demandes y a les denuncies de violencia ya intimidación. Lo que sí evidencien los sucesos de les últimes selmanes ye un clima social cada vegada más tensu, nel que distintos colectivos vienen denunciando ataques y menacies de motivación política, homófoba o tránsfoba.

This work is licensed under a Creative Commons Attribution 4.0 International License.