Les 270 viviendes públiques proyectaes sobre les parceles cedíes pol Conceyu d’Uviéu van empezar a construyise, según la previsión actual del Principáu, en 2027. Les obres van tener un plazu estimáu de 28 meses, polo que la finalización podría desplazase hasta’l cuartu trimestre de 2029.

La Conseyería de Vivienda calcula una inversión cercana a los 65 millones d’euros. El procesu ta agora na preparación de los proyectos y necesita completar formalmente la cesión de los terrenos, pasar pel Conseyu de Gobiernu y coordinar el conveniu col Ministeriu pa disponer de los fondos del Plan Estatal de Vivienda. L’oxetivu ye poder sacar la licitación a finales de 2026.

El calendariu representa un retrasu frente a les previsiones anunciaes cuando se presentó la operación. En xunetu de 2025 el Principáu trabayaba col horizonte d’abril de 2026 pa tener resuelta la licitación y empezar les obres esi mesmu añu.

Nun se trata d’un detalle menor nun momentu nel que l’accesu a la vivienda ta convirtiendo una parte creciente del país en zona de fuerte presión residencial. Cada añu de retrasu nun calendariu de vivienda pública ye un añu nel que la demanda sigue dependiendo fundamentalmente del mercáu priváu.

El Principáu necesita aumentar un parque públicu históricamente reducíu. Les 270 viviendes van destinarse a alquiler asequible y una parte de la promoción pretende atender específicamente a mocedá y necesidaes venceyaes a la Universidá d’Uviéu. Pero la dificultá pa pagar un techu afecta yá tamién a persones con emplegu, non solamente a quien ta fuera del mercáu llaboral.

La mocedá ye especialmente sensible a los plazos. Namái’l 11,9% de les persones asturianes d’ente 16 y 29 años consiguiera emancipase. Quien tien agora 25 años va tener cerca de 29 cuando, si se cumple’l calendariu actual, les viviendes puedan empezar a tar disponibles.

La relación ente salarios y alquiler agrava la espera. Los precios del arriendu vienen actuando como una barrera directa pa la emancipación, inclusive ente población mozo con ingresos llaborales.

Nel estremu más grave del problema residencial, l’aumentu del ensinllarismu demuestra les consecuencies de nun disponer d’un parque de vivienda accesible suficiente. Son realidaes diferentes, pero tienen un puntu común: l’accesu a una vivienda nun pue depender únicamente de la capacidá de competir nel mercáu priváu.

El retrasu nun significa que’l proyectu tea paralizáu. Hai estudios topográficos realizaos, proyectos en preparación, suelu cedíu y una previsión d’inversión concreta. La diferencia ta nos tiempos: lo que en xunetu de 2025 s’anunciaba con obres a entamar en 2026 pasa agora a una licitación a finales d’esi añu, construcción en 2027 y posible entrega a finales de 2029.

Una política de vivienda pública necesita suelu, presupuestu y procedimientos garantistes, pero tamién velocidá. La demanda residencial nun queda suspendida mientres se tramiten espedientes. Si la promoción pública ye una de les ferramientes centrales pa contener la crisis d’accesu a la vivienda, el cumplimientu de los calendarios forma parte del resultáu que la ciudadanía puede esixir.

This work is licensed under a Creative Commons Attribution 4.0 International License.