L’ensillarismu en Xixón medra un 14% nun año y ya hay más de 1.000 persones en situación de vulnerabilidá severa. La Rede d’Inclusión Activa (Redia), formada pol Conceyu y diverses entidaes sociales, incorporó en 2025 a 1.084 persones nueves, un 14% más que l’añu anterior. Nel 2024 sumáronse 949 persones, ello ye, que’l problema non solo medra, sinón que medra ca vuelta más rápido.
L’ensinllarismu nun se llenda a quien duerme na cai. La definición inclúi tamién a persones que viven en viviendes insegures, habitaciones compartíes ensin estabilidá, allugamientos temporales o espacios que nun reúnen condiciones afayadices d’habitabilidá. Sicasí, cuasi la metá de les persones atendies por estos motivos viven na cai. La situación resulta especialmente esmolecedora pol aumentu d’estes situaciones, si en 2024 representaben el 30,8% de los usuarios de la rede, en 2025 la cifra xubió hasta’l 41,4%. Aparte de los que s’averen a buscar ayuda, el proyectu Eslabón atendió a 316 persones en situación d’ensinllarismu na vía pública a lo llargo del añu.
Los datos figuren na memoria de xestión de la Fundación Municipal de Servicios Sociales, que señala que dende la creación de la Redia en 2012 fueron atendíes 11.848 persones. El perfil mayoritariu de los atendios sigue siendo masculín. Siete de cada diez nuevos usuarios rexistraos en 2025 son homes. Amás, el porcentaxe de muyeres baxó al 29,43%, el nivel más baxu rexistráu dende la pandemia.
Per nacionalidaes, seique nun hai datos de qué porcentaxe correspuende a asturianos, si que se sabe que cuasi l’ocho por cientu, alrodiu d’ochenta persones, son direutamente xixoneses que pierden el so llar; el 31% de les persones atendíes son españoles, ente que’l 63,9% proceden d’otros países. Colombia, Venezuela, Perú y Cuba son los oríxenes más frecuentes ente les persones migrantes atendíes pola rede.
Tres estes cifres atópase una realidá que les organizaciones sociales vienen denunciando dende hai años: l’accesu a la vivienda convirtióse nuna de les principales causes d’esclusión social. L’aumentu de los precios del alquiler, la escasez d’ufierta y les esixencies impuestes por munchos propietarios —nómines elevaes, contratos indefiníos, avales o fiadores— dexen fuera del mercáu a un númberu creciente de persones.
Nesti contestu, tener un emplegu y unos ingresos regulares yá nun garantiza poder acceder a una vivienda. Les entidaes qu’intervienen nel sector alvierten de que cada vez son más frecuentes los casos de persones trabayadores que, a pesar de cuntar con ingresos, nun consiguen atopar un alquiler que puedan asumir o cumplir los requisitos esixíos pa formalizar un contratu.
La situación afecta especialmente a la población moza, a les persones migrantes y a quien desempeñen trabayos temporales o con salarios baxos, que ven cómo una parte creciente de los sos ingresos tien de destinase al pagu de la vivienda, llegando a requirir el 80% del salariu.
La memoria de la Fundación Municipal de Servicios Sociales recueye amás otros indicadores de vulnerabilidá. Nel pasáu añu repartieronse cerca de 2,5 millones d’euros en ayudes d’emerxencia ya integración y fueron atendíes 40.713 persones nes ocho unidaes de trabayu social distribuyíes pola ciudá.
This work is licensed under a Creative Commons Attribution 4.0 International License.
