LATE Asturias alertó esti domingu del aumentu de la hostilidá contra les persones migrantes y tamién contra les organizaciones que trabayen pola integración. La denuncia producióse coincidiendo cola XVII Fiesta Intercultural de la organización, celebrada nel Muséu del Pueblu d’Asturies, en Xixón, nuna xornada concebida precisamente pa favorecer l’alcuentru ente cultures.

LATE nun ye una organización creada al calor del actual debate migratoriu. La asociación trabaya n’Asturies con población africano en situación de vulnerabilidá y desenvolvi programes d’acompañamientu social, asesoramientu, formación, empoderamientu y participación. Otra de les sos llinies de trabayu ye la sensibilización contra’l racismu y la xenofobia al traviés d’actividaes culturales y educatives.

La preocupación que tresllada agora nun apaez nun vacíu. Va unes selmanes, La Florida tuvo que convocar una movilización contra’l racismu y en sofitu a los menores tutelaos depués de que la llegada d’ocho rapacinos a un recursu residencial provocara protestes nes que fueron ganando presencia organizaciones d’extrema drecha.

Aquella polémica fixo visible una diferencia de tratu que va más allá d’un casu concretu. El racismu y l’aporofobia ayuden a esplicar por qué non toles persones foriates son percibíes socialmente de la mesma manera: la sospecha concéntrase especialmente sobre quien llega ensin recursos, ta racializáu o necesita protección pública.

La normalización d’esi llinguaxe tampoco se llenda a grupos marxinales d’internet. Va menos d’una selmana, Sanz Montes utilizó la celebración de Cuadonga pa formular un discursu sobre migración cargáu de retórica bélica y espresiones xenófobes. Cuando esi vocabulariu llega dende posiciones con visibilidá institucional, contribúi a facer socialmente asumibles marcos que presenten a persones enteres como una amenaza.

La discriminación, amás, nun ye namái verbal. N’otros ámbitos apaecen torgues al accesu efectivu a derechos: estudiantes migrantes matriculaos llegalmente en Formación Profesional toparon impedimentos pa facer les práctiques obligatories por problemas venceyaos a la documentación administrativa. La integración resulta difícil de reclamar si les propies estructures burocrátiques dificulten completar una formación.

La vulnerabilidá económica completa’l cuadru. En Xixón, l’aumentu del ensinllarismu amuesa hasta qué puntu l’accesu a vivienda y recursos básicos ta convirtiéndose nun problema estructural. Les persones migrantes en situación precaria formen parte de les poblaciones que pueden quedar especialmente espuestes a esa esclusión.

Énte esti contestu, la Fiesta Intercultural de LATE tuvo un conteníu que va más allá de la música, la gastronomía o los talleres. L’alcuentru xuntó actividaes culturales, xuegos, cuentos, danza y espresión artística alredor d’una idea sencilla: conocer y convivir ye incompatible cola construcción del otru como una amenaza abstracta.

La denuncia de LATE tien d’atribuyise a la propia organización, pero’l debate qu’abre ye públicu. Una sociedá puede discutir polítiques migratories, recursos o modelos d’acoyida; lo que nun debería aceptase como normal ye que la procedencia, el color de piel o la falta de recursos conviertan automáticamente a una persona en sospechosa. Cuando les entidaes que trabayen cada día cola población migrante empiecen a denunciar hostilidá tamién contra elles mesmes, la señal d’alarma merez ser atendida.

This work is licensed under a Creative Commons Attribution 4.0 International License.