Izquierda Unida abrió en Candás el nuevu cursu políticu reclamando al Gobiernu d’Asturies «pasar a la ofensiva». El coordinador xeneral d’IU Asturies, Ovidio Zapico, señaló como prioridaes la vivienda, el coste de la cesta de la compra y l’ampliación de derechos.

La formulación ye significativa porque IU nun fala dende la oposición: forma parte del propiu Executivu autonómicu.

La vivienda ye’l terrén onde la posición d’IU resulta más reconocible. Zapico valoró que’l TSXA refuguare suspender cautelarmente les zones tensionaes de L’Arena y Cimavilla. Esa estratexa yá se ta ampliando: Uviéu, Xixón, Ribeseya, La Pola Siero y Llugones entraron na siguiente fase del mapa de zones tensionaes.

Pero declarar zones nun resuelve por sí solo una emerxencia habitacional. Les movilizaciones pol drechu a la vivienda vienen reclamando alquileres asumibles, parque públicu y llendes a la especulación.

La conversión de vivienda en productu d’inversión, alquiler turísticu o segunda residencia reduz la ufierta estable y empuxa los precios.

La credibilidá d’esa posición mídese tamién nos desacuerdos que la coalición yá tuvo que xestionar. Nel casu de Costco en Siero, IU acabó asumiendo una decisión del Gobiernu que provocó fuertes crítiques pol impactu urbanísticu y comercial.

Lo mesmo pasa cola «ampliación de derechos». El Gobiernu impulsó una Llei de Cultura ya Identidá que nun sustitúi la oficialidá nin crea los mesmos derechos llingüísticos.

«Pasar a la ofensiva» ye una consigna potente. La cuestión ye si na recta final de la llexislatura va traducise en decisiones capaces de marcar diferencies reales dientro del Gobiernu o si va quedar como’l primer lema del nuevu cursu políticu.

This work is licensed under a Creative Commons Attribution 4.0 International License.