La movilización va celebrase esti sábadu 12 de setiembre, a les 19:00 hores, na plaza de la Catedral, tres l’agresión sufrida por Jorge y Rosón, militantes d’AMA Asturies

AMA Asturies convoca mañana, sábadu 12 de setiembre, una concentración contra l’agresión facista sufrida esta selmana n’Uviéu por dos de los sos militantes. La protesta va entamar a les 19:00 hores na plaza de la Catedral, col lema «Contra la agresión fascista» y una llamada clara a ocupar l’espaciu públicu frente al odiu: «Si-yos molesta l’arcuíris, llenemos Uviéu de collor».

La convocatoria llega tres l’agresión sufrida por Jorge y Rosón, integrantes d’AMA Asturies. Según el comunicáu difundíu pola Corriente Sindical d’Izquierda (CSI), fueron atacaos por individuos venceyaos a la estrema drecha al glayíu de «rojos de mierda» y «Arriba España».

Nun se trata d’una simple engarradiella nin d’un episodiu que pueda tratase como aislláu. Recientemente venimos asistiendo a la normalización de discursos d’odiu y del intentu d’utilizar la intimidación y la violencia contra quien defende posiciones polítiques, sociales o sindicales contraries a la extrema drecha.

La concentración de mañana pretende convertise nuna respuesta a esi facismu y nuna demostración pública de solidaridá. AMA Asturies escoyó precisamente la plaza de la Catedral, nel centru d’Uviéu y nel mesmu contestu de les fiestes de San Matéu, pa reclamar que les cais sigan siendo espacios de convivencia y llibertá.

La cita ye mañana, sábadu 12 de setiembre, a les 19:00 hores, na plaza de la Catedral d’Uviéu. Una convocatoria que, más allá del sofitu a Jorge y Rosón, plantega una respuesta colectiva frente a les agresiones facistes y a la normalización del odiu.

This work is licensed under a Creative Commons Attribution 4.0 International License.