La Ofiacialidá nun llega, pero l’asturianismu ‘amable’ confórmase con cualisquier migaya

La creación de la especialidá docente del asturianu pue reparar una inxusticia llaboral col profesoráu, pero ensin oficialidá nun garantiza derechos llingüísticos nin cambia la subordinación política de la llingua.

L’anunciu de la creación de la especialidá docente del asturianu ta siendo presentáu como un día históricu, un saltu alantre y una victoria colectiva. Pero convien poner les coses nel so sitiu: que’l profesoráu d’asturianu tenga una especialidá reconocida pue ser una correición necesaria d’una inxusticia llaboral evidente, pero nun ye un avance real pa la llingua si nun vien acompañáu de la oficialidá.

Lo que se repara agora ye, en bona midida, una anomalía creada pola propia falta de reconocimientu xurídicu del asturianu. Si durante años el profesoráu tuvo condergáu a la interinidá, a la provisionalidá y a una situación distinta a la del restu de docentes, nun foi por casualidá nin por un problema téunicu menor: foi porque Asturies sigue ensin reconocer la so llingua como oficial. Lo que güei se vende como conquista ye, primero de too, la prueba del fracasu d’un modelu basáu en parches.

Nesti sen, hai que ser claros: la especialidá docente pue beneficiar al profesoráu, pero nun garantiza que la ciudadanía tenga derechu a vivir n’asturianu. Nun garantiza atención alministrativa, nun garantiza presencia real na xusticia, nun garantiza escolarización digna, nun garantiza medios públicos n’asturianu, nun garantiza normalidá social. Pa eso fai falta Oficialidá, non una concesión parcial que depende de la voluntá del Gobiernu de turnu y del marcu que quiera autorizar Madrid.

La diferencia ye fonda. Una especialidá docente ye una ferramienta alministrativa. La oficialidá ye un derechu democráticu. Confundir una cosa cola otra ye peligrosu, porque permite al poder presentar como solución lo que namás ye un remiendu. Y Asturies lleva demasiáu tiempu viviendo de remiendos: lleis d’usu incumplies, planes de normalización ensin capacidá real, toponimia oficial que la propia Alministración ignora, campañes simbóliques y discursos bienintencionaos que nunca lleguen al puntu central.

Por eso esti anunciu tamién vuelve abrir una controversia que vien medrando dientro del asturianismu. D’un llau ta l’asturianismu “amable”, esi que celebra cada xestu institucional como si fuera una victoria irreversible, que busca nun incomodar, que acepta avances mínimos porque considera que cualquier pasu, por pequeñu que seya, ye meyor que nada. D’otru llau ta’l nacionalismu asturianu, o siquier un asturianismu políticu más esixente, que recuerda que la cuestión nun ye si nos dexen usar un poco más la llingua, sinón quién tien autoridá pa decidir si podemos usala o non.

La polémica que rula estos díes pel asturianismu espresa esa diferencia fonda. Hai quien celebra que’l poder nos dexe ocupar un sitiu pequeñu, provisional y condicionáu; hai quien reclama que l’asturianu tenga los mesmos derechos que cualquier otra llingua del Estáu; y hai quien va acullá y recuerda que’l problema de fondu ye aceptar que seya otru quien decida si Asturies tien derechu o non a vivir na so propia llingua. Esa ye la cuestión central: nun se trata de que mos permitan xubir a un autobús, sinón de dexar de considerar normal que la llave del autobús la tenga siempre otru.

Esi ye’l puntu que l’asturianismu institucional intenta evitar. Porque reconocer que ensin oficialidá nun hai derechos reales obliga a señalar responsables. Obliga a dicir que’l PSOE ye’l culpable, que la “oficialidá amable” foi una fórmula pa desactivar la reivindicación, y que la llamada “Llei de Cultura ya Identidá” nun sustituye de nenguna manera una reforma estatutaria que reconoza al asturianu como llingua oficial.

La cuestión ye especialmente grave porque la falta d’oficialidá nun ye un problema abstractu. Vese cada día. Vese cuando los presupuestos del “Principado” tornen dexar la llingua ensin marcu real de derechos, como yá denunciamos al falar de cómo los presupuestos ignoren la Oficialidá. Vese cuando la toponimia oficial se incumple una y otra vegada, como volvió pasar cola señalización de los intercambiadores. Vese cuando l’asturianu queda p’actos, cartelos y declaraciones, pero non pal funcionamientu normal de les instituciones.

Por eso hai que valorar la situación del profesoráu ensin cayer na propaganda. Si la especialidá sirve pa dar estabilidá a profesionales que lleven años sufriendo una discriminación llaboral, bienvenida seya. Pero nun se pue vender como normalización lo que nun normaliza la llingua. Nun se pue llamar victoria histórica a una midida que confirma que l’asturianu sigue dependiendo de permisos, esceiciones y encaxes xurídicos buscaos al llende de la oficialidá.

L’asturianismu “amable” pue conformase con eso. Pue dicir que ye un pasu, que nun convien tensar, que hai que celebrar lo posible. Pero esa lóxica ye la mesma que lleva décades convirtiendo la reivindicación nacional y llingüística d’Asturies nuna cadena de migayes. Primero una llei d’usu. Llueu una campaña. Llueu un plan. Llueu una especialidá. Llueu una promesa. Y mentanto, la oficialidá sigue ensin llegar.

El problema ye políticu, non pedagóxicu. Ye’l mesmu fondu que s’atopa cuando se fala del asturianismu conservador y les renuncies por incomparecencia: aceptar una identidá asturiana decorativa, ensin conflictu, ensin derechos, ensin capacidá de disputar poder. Una identidá que pue esistir siempre que nun cuestione’l marcu que la subordina.

Por eso, esti anunciu nun tien que zarrar’l debate, sinón abrilu más. La pregunta nun ye si la especialidá docente ye positiva pal profesoráu. La pregunta ye por qué tuvo que llegar tan tarde, por qué depende d’un apañu estatal y por qué se presenta como solución cuando’l problema de fondu sigue intactu.

Ensin oficialidá, l’asturianu sigue siendo una llingua tolerada, non una llingua con derechos. Y una llingua tolerada pue tener profesores, cursos, premios, actos y campañes, pero sigue ensin tener garantida la so vida pública. Lo demás son avances alministrativos. Útiles, si se quier. Necesarios, incluso. Pero ensin oficialidá nun son dengún avance real.

This work is licensed under a Creative Commons Attribution 4.0 International License.