Opinión: Llucía Fernández Marqués

Sí que yéremos adelantaos n’Asturies, que mos dexábemos influyir poles películes americanes allá pel añu 1927, cuando Evaristo Valle pintaba “Mascarones de la calabaza”

Sí, cellebro la Nueche d’Ánimes, Halloween, Samaín o comu quiera llamáse. Non, nun soi una traidora a la cultura propia. Dame igual cuanta xente se persigne ofendía, insistiendo qu’esti ye’l díi de visitar cementerios con veles, poner flores y rezar, nun m’interesa si pa ellos esti ye’l día de tolos santos o non.

Cellebro esti díi, pa entamar, comu m’ensiñaron en casa: con veles na ventana, pa que los muertos topen el camín de vuelta, con bebida y castañes pa que recuperen fuercies de tan llargu viaxe.

Y si, en ca mio tamién antroxamos, esi vezu “foriatu” que deprendimos, dicen de les películes americanes. Sí que yéremos adelantaos n’Asturies, que mos dexábemos influyir poles películes americanes allá pel añu 1927, cuando Evaristo Valle pintaba “Mascarones de la calabaza”, el cuadru tamién conocíu comu Mazcarada de seronda na qu’un garrapiellu de mazcaritos paseen una calabaza con cara a llombu d’un caballu. Frente al sermón repetíu de que les calabaces, les mázcares y les celebraciones de la Nueche d’Ánimes son una importación ayena a Asturies, el pintor xixonés déxanos una imaxe incómoda: una comparsa de mazcaritos na que la calabaza tien protagonismu, pintada hacia 1927, muncho primero de la espansión comercial del Halloween que conocemos güei.

Nun ye l’únicu resclavu d’esos vezos. L’etnógrafu Alberto Álvarez Peña recueye la costume de vaciar calabaces, meté-yos una vela y asitiales nos cruces de caminos, nos güertos o nes ventanes p’asustar a los vecinos. Esplicó, amás, que primero facíase con nabos. 

Nesi mesmu mundu tradicional atopamos les ufriendes de comida a los muertos, los banquetes funerarios y les peticiones poles cases. Álvarez Peña rellaciona estes últimes col ciclu de los aguilandos, que s’allarga hasta l’Antroxu. Tamién recuerda la oposición eclesiástica a determinaes práctiques funeraries populares, comu xintar y beber sidre con ellos nos cementerios. La relación ente la Ilesia y estos vezos foi muncho más conflictiva y complexa de lo que suxure’l rellatu d’una tradición esclusivamente católica, uniforme ya ensin fisures.

Por eso, cuando dende sectores eclesiásticos o españolistes se despacha cualquier celebración con calabaces y antrozos como una moda estranxera, lo que se fai ye borrar una parte de la memoria popular, recuperada, ye cierto, gracies al “retornu” que facilitó la conservación d’esos mesmos vezos nes nueses cultures hermanes. Pue criticase, si se quier, el nome: tenemos el de nueso: Nueche d’Ánimes.

Entós… ¿Por qué esa oposición encarnizada y ofendía al trucu o tratu, al cabu, un aguilandu de tola vida? igual a los sectores más españoles y catolicistes duel-yos qu’Asturies pueda reconocese más próxima a les cultures atlántiques y a los sos raigaños qu’al modelu cultural mesetariu, esencia d’España; ofiende que’l nuesu mapa d’afinidaes nun tenga necesariamente Madrid nel centru, que podamos mirar al mar pa entendemos, en cuentes de volver la cara al sur. Estorba que’l vraeru vezu importáu seya’l que lleva cruz y reza con llárimes golpes en pechu.

La discusión sobre una calabaza acaba siendo una discusión sobre quién tien drechu a interpretar Asturies. Sobre si la nuesa tradición pue falar con voz propia o tien de pasar primero pol filtru de lo español. Sobre por qué determinaes costumes reciben el sellu de respetabilidá y otres conviértense en sospechoses en cuanto recuerden que la cultura asturiana tien caminos, parentescos y memoria propios.

Evaristo Valle nun pintó un manifiestu sobre Halloween, cierto. Pintó un mundu de mazcarones nel que la calabaza tenía sitiu na seronda. Cuasi un sieglu dempués, esa imaxe sigue teniendo la capacidá de desmontar argumentos bien probes. Quien quiera espulsar les calabaces y les cellebraciones de seronda de la tradición asturiana va tener que discutir tamién con Valle.

This work is licensed under a Creative Commons Attribution 4.0 International License.