La tramitación de la Llei de Vivienda abrió una crisis institucional na Xunta Xeneral. El conseyeru Ovidio Zapico anunció ayeri, 10 de payares, que suspende la so asistencia a les sesiones de control promovíes pola oposición mientres siga’l bloquéu de la norma.
La falta de representantes del PP, Vox y Foro nes reuniones de la ponencia impide algamar el quórum necesariu pa continuar los trabayos. Zapico considera que les ausencies son una maniobra deliberada y pidió amparu al presidente del parlamentu, Juan Cofiño, según recueye Europa Press.
Un informe pa esclariar lo asocedío
Cofiño recordó que’l Gobiernu tien de sometese a la fiscalización parlamentaria. Tamién encargó a los servicios xurídicos un informe sobre la tramitación del proyectu y la obligación de los diputaos d’asistir a los órganos de la Cámara. La Mesa habrá decidir a la vista d’esi documentu.
Pela so parte, los grupos de la oposición aleguen problemes col plazu de convocatoria y coincidencies con otres actividaes parlamentaries. La información d’EFE, espublizada n’elDiario.es, señala que los lletraos yá descartaren les oxeciones d’inconstitucionalidá presentaes pol PP a enmiendes incorporaes por Covadonga Tomé.
La urxencia de la vivienda, na cai
El conflictu coincide cola fuelga xeneral d’esti 11 de payares pola vivienda y los salarios. L’accesu a una casa tamién centra informaciones recientes d’InfoAsturies sobre la xubida de los precios n’Asturies y la relación ente alquiler y probeza.
La dimensión cotidiana d’esi problema apaez nel desfiuciu aplazáu de Dori, en Les Campes, y nel alderique sobre turistificación y vivienda nel oriente asturianu. La Llei de Vivienda sigue pendiente de completar la so tramitación.
Semeya d’archivu: Noemy García García / Wikimedia Commons, CC BY-SA 2.5 España.
This work is licensed under a Creative Commons Attribution 4.0 International License.
