Botelles coles estremaes etiquetes de la DOP Sidra d’Asturies
La DOP presentó en Villaviciosa la etiqueta que van llevar les botelles certificaes. Los llagares podrán acoyer al sellu les ellaboraciones de la collecha de 2026 que cumplan los requisitos.
Ayer presentóse en Villaviciosa la etiqueta que va identificar la sidre de xelu certificada pola DOP Sidra d’Asturies. El distintivu, vertical y de 24 × 36 milímetros, ye más pequeñu que los del restu de la denominación p’adaptase a les botelles d’esta especialidá. El tonu ámbare acobrizáu recuerda’l color de la sidre na copa.
El Conseyu Regulador dio a conocer el diseñu na so sede del edificiu San Xuan de Capistrano. El presidente del organismu, Jorge García, el xerente, Daniel Ruiz, y la directora del SERIDA, María del Carmen Oliván, destacaron que la incorporación de la sidre de xelu al pliegu de condiciones completóse en diez meses. Según avanzó Ruiz, les primeres botelles col distintivu podríen tar disponibles ente xunu y xunetu de 2027.
La incorporación abre a los llagares una vía pa diversificar la so ufierta y llevar un productu ellaboráu con mazana asturiana a la restauración gastronómica y al comerciu especializáu. García defendió que la sidre de xelu amplía la gama de la denominación y refuerza’l conxuntu de productos que comercializa la DOP.
La reforma del pliegu, publicada nel BOE del 26 d’ochobre, permite certificar esta especialidá. Pa llevar la etiqueta, cada ellaboración tendrá que superar los controles del Conseyu Regulador.
Pa incorporar la sidre de xelu al pliegu había que definir qué característiques tenía que cumplir y cómo evaluáles. El SERIDA estudió les propiedaes físiques y químiques del productu y fixó los parámetros sensoriales pa que les tasties de certificación sigan criterios comunes.
Oliván atribuyó la rapidez del procesu a los años d’investigación que’l personal del SERIDA lleva dedicaos a la sidre. Los responsables del Conseyu destacaron tamién la implicación de los llagares, el trabayu del equipu técnicu de la DOP y el sofitu de la Conseyería de Mediu Rural y Política Agraria.
This work is licensed under a Creative Commons Attribution 4.0 International License.
