La protesta d’ayeri n’Uviéu dio continuidá a años de contestación popular a la Corona española. La coincidencia cola acampada pola vivienda reforzó la denuncia d’un modelu que xunta privilexos hereditarios y poder económicu mentes medren les dificultaes pa vivir dignamente
La Escandalera volvió ser ayeri, vienres 23 d’ochobre, l’espaciu d’una Asturies que nun s’identifica cola monarquía española nin cola imaxe d’adhesión a ella que proyeuta la ceremonia de los Premios Princesa. La concentración republicana coincidió cola acampada pola vivienda que permanez na plaza, xuntando la refuga a la Corona cola esixencia de garantizar drechos materiales básicos. Frente al Teatru Campoamor, les revindicaciones de vivienda y d’igualdá cuestionaron el consensu que pretende representar la gala.
Convocada pa les cinco de la tarde pola Marcha Republicana del Norte, la movilización reclamaba una consulta popular venceyante sobre’l modelu d’Estáu y una alternativa republicana asturiana basada na llibertá, la igualdá y la xusticia social.
La llegada de la familia real tuvo acompañada de xiblíos, abucheos y conseñes republicanes. Na plaza ondearon banderes asturianes, palestines y republicanes, mentes un ampliu dispositivu policial y les valles llendaben l’espaciu de la protesta.
La protesta d’ayeri forma parte d’una contestación sostenida nel tiempu, dende la primer entrega de los entos Premios Principe, nel añu 1981 fasta ayeri mesmo.
La crítica al poder capitalista que sostién la Fundación Princesa tien una base concreta na composición de la propia entidá. Nel so Patronatu de gobiernu figuren representantes de Banco Sabadell, Banco Santander, BBVA y Corporación Masaveu. Esti órganu establez les actividaes, aprueba los presupuestos y les cuentes y fixa los criterios d’actuación: la presencia de la gran banca y del capital empresarial marca, poro, la toma de decisiones.
A esa cadarma súmase’l Patronatu Princesa de Asturias, de calter “consultivu y honoríficu”, onde apaecen corporaciones como ACS, Acciona, Iberdrola, Repsol, Telefónica y Merlin Properties. La Fundación constitúi asina un espaciu d’alcuentru ente la Corona y grandes poderes financieros, empresariales ya inmobiliarios. Esa composición ayuda a entender por qué la contestación a los premios inclúi una crítica de clase.
Amás, l’esfuerzu por reforzar n’Asturies l’escasu venceyu monárquica forma parte de los oxetivos declaraos pola propia Fundación qu’inclúin consolidar los vínculos ente Asturies y el títulu de quien hereda la Corona española.
La coincidencia cola acampada pola vivienda dio a la xornada una dimensión social especialmente visible. Andrés García, portavoz del Sindicatu d’Inquilines n’Asturies, esplicó que la protesta cuestionaba tamién a la clase política y económica reunida nel Campoamor, alloñada de les dificultaes d’accesu a una casa y de los problemes llaborales que sufren quienes se movilicen.
La movilización volvió facer visible la decisión de la sociedá asturian, que se resiste a quedar convertida en decoráu de la monarquía española. Añu tres añu, la Escandalera recuerda que nun somos súbditos de naide, y menos de la corona española.
This work is licensed under a Creative Commons Attribution 4.0 International License.
