Andecha Astur reclama que la reforma del Reglamentu de Padremuñu Cultural del refuercie de manera efectiva la protección de los horros, paneres y cabazos, evitando que la flexibilización de la normativa acabe facilitando la perda, el deterioru o la desnaturalización d’estes construcciones.

Les alegaciones presentaes nel trámite d’información pública del espediente NORM/2023/72 inclúin una serie de propuestes concretes. Entre elles ta la creación d’un protocolu d’emerxencia con respuesta máxima de 72 hores pa los casos de riesgu grave, de forma que l’Alministración pueda actuar anantes de que los daños seyan irreversibles.

Andecha plantega tamién la creación d’un rexistru públicu únicu y actualizáu de horros, paneres y cabazos, acompañáu de mecanismos de seguimientu de les denuncies. La organización considera necesario que cualquier persona que comunique una situación de peligru pueda saber qué organismu se fai cargu del casu, qué actuaciones se ponen en marcha y cuál ye la resolución adoptada.

Otra de les cuestiones centrales ye la regulación de les declaraciones de ruina. Andecha reclama mayores garantíes pa evitar que’l deterioru d’un horru pueda convertise nuna vía indirecta pa facilitar el so baltu o la perda de protección. La organización recuerda que se trata de construcciones desmontables y reparables por pieces y considera que la ruina nun debería conducir automáticamente a la desaparición del bien.

Les alegaciones planteguen igualmente criterios más estrictos pa los tresllaos. Andecha defende que mover un horru, una panera o un cabazu tendría de ser siempre una medida excepcional y debidamente xustificada, procurando caltener la relación de la construcción col so entornu tradicional y evitando que’l treslláu acabe descontextualizando completamente’l bien.

La organización nun refuga que puedan existir nuevos usos que contribuyan a garantizar la conservación, pero reclama que seyan compatibles col valor cultural de les construcciones, reversibles y sometíos a controles claros. El plantegamientu ye evitar que los horros y paneres puedan acabar convertíos simplemente n’unidaes independientes d’allugamientu o en recursos turísticos desvenceyaos de la so función y significáu cultural.

Otru de los puntos fundamentales ye’l de les ayudes públiques. Andecha considera que la conservación nun puede depender únicamente de la capacidá económica de los propietarios y reclama mecanismos de sofitu que permitan realizar actuaciones de caltenimientu y restauración cuando los costes superen les posibilidaes de les families.

Les alegaciones inclúin además la creación d’una comisión técnica permanente y plural, con participación d’especialistes, artesanos, conceyos y asociaciones con experiencia na defensa del padremuñu. El so papel sedría contribuir al seguimientu de la normativa, valorar situaciones conflictives y aportar criterios técnicos y culturales na toma de decisiones.

La propuesta d’Andecha va más allá de conservar físicamente les construcciones. La organización reclama tamién programes de formación práctica y de tresmisión interxeneracional que permitan caltener vivos los conocimientos tradicionales necesarios pa la reparación y restauración de horros, paneres y cabazos. La protección tendría d’algamar, poro, non solo a la maera y la piedra, sinón tamién a los oficios, les técniques constructives, el pallabreru y los conocimientos acumulaos durante xeneraciones.

Esta intervención nun ye un episodiu aislláu. La defensa del padremuñu asturianu forma parte d’una trayectoria histórica d’Andecha Astur, que vien interviniendo dende hai años ante situaciones de deterioru o amenaza sobre bienes culturales y paisaxísticos del país. Esa implicación previa ayuda a entender el sentíu de les alegaciones actuales: nun se trata namás de reaccionar ante una reforma normativa concreta, sinón de reclamar mecanismos que permitan evitar que se repitan situaciones yá conocíes.

Un exemplu especialmente significativu foi’l del Horru de Vis, n’Amieva, tres el so esbarrumbu en 2020. Andecha presentó una denuncia ante la Fiscalía Superior y reclamó responsabilidaes pola falta d’actuación previa, señalando que l’Alministración tenía conocencia dende años atrás del grave deterioru del bien. La Fiscalía reconoció posteriormente que’l Gobiernu asturianu conocía la situación, anque centró les responsabilidaes nos propietarios.

Esi casu reforció una de les idegues que vuelve agora a apaecer nes alegaciones: llegar tarde equival a una sentencia de desaniciu. Por eso la organización insiste na necesidá de protocolos rápidos, seguimientu de denuncies, responsabilidaes definíes y capacidá d’intervención cuando exista un peligru evidente.

La visión que defende Andecha ye integral. Los horros, paneres y cabazos formen parte d’un sistema cultural más ampliu nel que tamién entren el paisaxe, les caseríes, los montes, los usos tradicionales, los oficios y la relación histórica de les comunidaes col territoriu. Esa mesma concepción llevó a la organización a intervenir n’otros alderiques venceyaos a la protección ambiental y paisaxística d’Asturies, reclamando que les decisiones económiques o urbanístiques nun se faigan a costa de la destrucción de elementos esenciales de la cultura del país.

Con estes alegaciones, Andecha Astur reclama que la reforma del reglamentu nun quede nuna simple actualización administrativa y se convierta nuna ferramienta real de protección. La flexibilización de usos, los posibles tresllaos o les declaraciones de ruina tendríen que dir acompañaes d’inspección, recursos, controles y responsabilidá pública.

La experiencia acumulada durante años de defensa del padremuñu lleva a la organización a insistir nuna idega central: reconocer el valor cultural de los horros nun ye abondo. Pa garantizar la so supervivencia fain falta actuaciones concretes, prevención, recursos económicos y una Alministración capaz de retrucar anantes de que’l deterioru seya irreversible.

This work is licensed under a Creative Commons Attribution 4.0 International License.