Los resultaos oficiales del 16º Salón Internacional de les Sidres de Gala dexen 21 distinciones pa productos asturianos, ente elles trés Premium y dos Oros. Francia foi’l país o territoriu con mayor númberu de premios, con 30, nuna edición na que se concedieron 223 galardones repartíos ente 21 Premium, 12 Oros, 94 Plates y 96 Bronces.
Consultar los Premios del 16º SISGA
La espublización del llistáu oficial de los Premios del 16º SISGA permite facer una primera radiografía del resultáu d’una edición marcada pola enorme diversidá y cantidá de procedencies, estilos y formes d’entender la sidre. En total, el xuráu concedió 223 distinciones nes 22 categoríes afitaes: 21 Premium, 12 Oros, 94 Plates y 96 Bronces.
El territoriu que más premios algamó foi Francia, con 30 galardones, repartíos ente productores procedentes de distintes zones sidreres del país. La participación francesa nel SISGA’26 taba formada por 13 llagares, con una presencia especialmente fuerte nes categoríes de sidres d’espolleta con carbónicu natural, perada y productos derivaos. SISGA’26
Los productos asturianos sumaron 21 distinciones, repartíes ente 12 llagares, con un balance de 3 Premium, 2 Oros, 12 Plates y 4 Bronces.
Los trés máximos galardones asturianos fueron pa Exner Craft Cider, de Gallinal Drinks, Premium na categoría d’espolleta con carbónicu añadíu semiseco; Ramos del Valle Brut, de Sidra Fran, Premium n’espolleta con carbónicu natural brut; y la Sidra de hielo de Sidra Cortina, Premium na categoría de sidre de xelu. SISGA’26
Los dos Oros fueron pa Brut Angelón, de Viuda de Angelón, na categoría d’espolleta con carbónicu natural brut, y Llicor El Duque, del llagar El Duque, na categoría de llicor de sidre.
El repartu completu de premios asturianos foi esti:
– Sidra Fran: 3 premios — Premium pa Ramos del Valle Brut y Plates pa Ramos del Valle Brut Nature y Sidra 1918 Ancestral.
– Riestra: 3 premios — una Plata y un Bronce pa Guzmán Riestra en categoríes d’espoleta, y otra Plata na categoría de sidre de xelu.
– Gallinal Drinks: 2 premios — Premium pa Exner Craft Cider y Plata pa Exner Única Sidra Artesana.
– Gobernador: 2 premios — Plata pa EM DOP y Bronce pa Españar DOP.
– El Duque: 2 premios — Oru pa Llicor El Duque y Bronce pa Calistrao.
– Paca y Tola Bebidas: 2 Plates, pa Naveta Brut y Naveta Roxa.
– Llagar Castañón: 2 premios — Plata pa La Bonagua y Bronce pa Roxmut.
– Sidra Cortina: Premium pola so Sidra de hielo.
– Viuda de Angelón: Oru pa Brut Angelón.
– Macrile: Plata pa M. Norniella Rosé.
– Valverán: Plata pa Valverán “20 manzanas”.
– Piñera: Plata pa Sidreral. SISGA’26
El repartu global de galardones muestra tamién el nivel d’esixencia del concursu. De los 223 productos premiaos, namás 21 consiguieron la categoría Premium, la máxima distinción del SISGA, y 12 recibieron Oru. La mayor parte del palmarés concentróse nes 94 Plates y 96 Bronces.
Esto significa que menos del 15 % de les distinciones concedíes foron Premium u Oru, ente que Plates y Bronces representaron más del 85 % del total.
El sistema de valoración del SISGA tien, amás, una particularidá fundamental: el xuráu ta formáu por un representante de cada llagar participante. La organización defende que esti modelu favorez la imparcialidá y, sobre manera, permite que nel xuráu tea representada la pluralidá de gustos, cultures y sensibilidaes que conviven nos distintos territorios sidreros del mundu.
El resultáu final confirma precisamente esa diversidá: nel palmarés apaecen sidres, peraes, llicores, espirituosos, sidres de xelu, vermús y productos ensin alcohol procedentes d’una xeografía sidrera cada vegada más amplia.
El llistáu completu de premios del SISGA’26, consultable tanto por categoría como por llagar, ta disponible na web oficial del certame.
This work is licensed under a Creative Commons Attribution 4.0 International License.
