El Gobiernu asturianu concedió 1.372.016,44 euros a 142 persones y entidaes titulares d’esplotaciones ganaderes pa favorecer la conversión y el caltenimientu de la producción ecolóxica. Les ayudes correspuenden a la campaña 2025 y cubren el 100% del importe base calculáu por hectárea.

Financiación europea, estatal y autonómica

La resolución, fechada’l 10 d’agostu y publicada esti 22 de setiembre nel Boletín Oficial del Principáu d’Asturies, distribúi la financiación ente tres administraciones. El 80% procede del Fondu Européu Agrícola de Desenvolvimientu Rural (Feader), el 6% del Estáu y el 14% del Principáu.

La llinia busca compensar parte de los costes y compromisos derivaos de trabayar con métodos ecolóxicos, tanto na fase de conversión como nel caltenimientu posterior. La cantidá concreta de cada espediente depende de la superficie y de les condiciones reconocíes na convocatoria.

Un sofitu nun momentu difícil pal campu

Les subvenciones lleguen nun añu marcáu pola presión de los costes, la falta de relevu y los efectos del clima. A finales d’agostu, el Certame de Ganáu Vacuno de Les Regueres volvió poner el focu nel retrocesu de la actividá. Pocos díes antes, InfoAsturies analizaba cómo el campu paga la falta d’adaptación al cambéu climáticu.

La producción ecolóxica pue abrir mercaos y reforciar la diferenciación del productu asturianu, pero nun resuelve por sí sola los problemes estructurales. Esa combinación d’innovación, rentabilidá y permanencia nel territoriu yá taba presente nos doce proyeutos pa salvar el campu asturianu presentaos pol Serida.

This work is licensed under a Creative Commons Attribution 4.0 International License.