La Llei d’Usu entró en vigor en 1998 y afitó que los topónimos d’Asturies habíen tener como denominación oficial la so forma tradicional. Güei, 28 años dempués, 74 de los 78 conceyos completaron el procesu, pero los nomes oficiales siguen ensin apaecer con normalidá en carreteres, tresporte públicu, documentos o comunicaciones institucionales. La oficialidá xeneral del asturianu sigue ensin llegar y hasta aquello que sí ye oficial continúa teniendo problemes pa salir del papel.

Si’l Merucu Xusticieru volviera esta nueche a percorrer Asturies, armáu pa esborrar de los cartelos los nomes que sustituyeron durante décades a la toponimia tradicional, nun tendría precisamente poco trabayu.

Pasaron 28 años dende que la Llei 1/1998, de 23 de marzu, d’Usu y Promoción del Bable/Asturianu, entró en vigor el 17 d’abril de 1998. El so artículu 15 nun dexa demasiáu espaciu pa la interpretación: los topónimos d’Asturies han tener la denominación oficial na so forma tradicional, con posibilidá de formes billingües cuando esista un usu xeneralizáu de dambes.

Hai, por tanto, una particularidá difícil d’ignorar: l’asturianu nun ye oficial con carácter xeneral, pero bona parte de la toponimia asturiana sí tien reconocencia oficial por llei y por decretos específicos. Y, sicasí, la distancia ente lo que dicen les normes y lo que se ve cada día sigue siendo considerable.

El procesu concretu d’oficialización conceyu a conceyu entamó años dempués de la Llei d’Usu y avanzó pasu ente pasu hasta llegar a 74 de los 78 conceyos asturianos.

La propia información oficial del Principáu contabiliza 23.224 topónimos oficiales localizaos xeográficamente en 74 conceyos, correspondientes a parroquies, capitales, núcleos urbanos, pueblos, aldees, barrios, quintanes y otros llugares.

Queden cuatro conceyos pendientes: Ayande, Cuideiru, Ibias y Navia. Iniciativa pol Asturianu volvió reclamar esti mes que s’active’l procesu nestos conceyos y que se cierre una xera que la propia normativa lleva cerca de tres décades contemplando.

El problema, sicasí, yá nun ye namás completar los cuatro conceyos que falten. Ye facer que lo que yá ye oficial seya realmente utilizao como tal.

El casu de Xixón ye particularmente ilustrativu. El Conseyu de Gobiernu aprobó’l Decretu 105/2006, de 20 de setiembre, d’oficialización de la toponimia del conceyu. La norma, publicada nel BOPA n’ochobre d’aquel añu, fixó una relación d’alredor de 750 topónimos. Esto ye: Xixón cumple agora 20 años dende l’aprobación del so decretu toponímicu.

Venti años deberíen ser tiempu abondo pa que la denominación oficial formara parte ensin conflictu de señalización, vehículos, documentación, cartelería y comunicación institucional.

Pero la realidá sigue siendo bastante menos uniforme.

Yá en 2025, la nueva cartelería instalada en Xixón volvió provocar crítiques pol tratamientu desigual del asturianu y pol usu de «Gijón» ensin la forma tradicional. El mesmu alderique apaeciera alredor de la nueva identidá gráfica municipal, pese a que’l Plan de Normalización Llingüística 2024-2027 contempla l’usu billingüe en distintos ámbitos.

Inclusive esti branu, nel espectáculu municipal de drones, volvió utilizase únicamente «Gijón», cuando n’ediciones anteriores apareciera la denominación oficial completa.

El resultáu ye paradóxicu: la norma tien dos décades; la discusión sobre si hai que cumplila sigue siendo cotidiana.

Nun ye tampoco un problema esclusivu de Xixón. En xunu d’esti mesmu añu, la nueva señalización de los intercambiadores de tresporte públicu en Llangréu volvió utilizar formes que nun respetaben la toponimia oficial. El problema ye especialmente llamativu porque nun se trataba de cartelería antigua pendiente de sustitución: yera infraestructura recién instalada.

En 2025 ocurrió otru tanto na carretera AS-369, onde cartelos nuevos siguíen identificando como «Malleza» a Maeza, pese a que la forma tradicional ye la oficialmente establecida nel decretu toponímicu de Salas. El casu obligó a reclamar la correición de la señalización.

Y la situación vien de muncho más atrás. En 2019, les señales nueves de l’autopista «Y» volvieron emplegar formes que nun recoyíen la toponimia oficial d’Uviéu y Xixón. Tampoco los sistemes dixitales quedaron al marxe. En 2024 denunciábase que la plataforma del Consorciu de Tresportes d’Asturies siguía ensin incorporar con normalidá la toponimia oficial.

El patrón repítese: hai decretu, hai nome oficial y, cada vez que se renueva una señal, una web, una base de datos o una campaña, vuelve apaecer la posibilidá de facelo como si la norma nun existiera.

Esti mesmu 2026 el Principáu aprobó’l Decretu 47/2026, de 22 de xunu, que regula un nuevu procedimientu de recuperación y fixación de la toponimia asturiana. La norma amplía’l campu d’actuación y permite trabayar non solo sobre entidaes de población, sinón sobre otros elementos xeográficos.

Como yá señalaba InfoAsturies cuando s’aprobó’l decretu, la cuestión de fondu sigue siendo cómo garantizar l’aplicación efectiva de los nomes que yá tán oficializaos.

Porque recuperar un topónimu, estudialu, consensualu, aprobalu nun decretu y incluyilu nun nomenclátor ye solo una parte del camín. La otra ye que dempués apareza nos cartelos, nos mapes, nos autobuses, nos formularios, nes webs y na comunicación diaria de les alministraciones.

Casi tres décades dempués de la Llei d’Usu, Asturies tien miles de nomes tradicionales recuperaos y oficializaos. Ye probablemente ún de los procesos de recuperación toponímica más importantes desarrollaos n’Europa nes últimes décades.

Pero basta percorrer les carreteres, mirar una pantalla institucional o reparar na señalización nueva pa comprobar que decretar un nome nun garantiza automáticamente que vuelva al paisaxe y esi ye, probablemente, el meyor resume del problema: la toponimia avanzó muncho nel BOPA; bastante menos na normalidá cotidiana.

Una illegalidá más de les que los asturianos entamamos a tar avezaos.

This work is licensed under a Creative Commons Attribution 4.0 International License.