La Guardia Civil detuvo a cinco homes de 18 a 20 años pola brutal agresión carecía por una muyer trans en Piedresblanques la nueche de Reis. El casu nun apaez aislláu: n’apenes unos meses Asturies conoció la desarticulación d’una banda neonazi que facía «caceríes», ataques ultres n’Uviéu y Xixón y un esmolecedor espoxigue de les agresiones contra’l colectivu LGTBI.

La Guardia Civil detuvo a cinco homes d’ente 18 y 20 años pola agresión física y verbal contra una muyer trans ocurrida’l pasáu mes de xineru  nel conceyu de Castrillón. La víctima acabó hospitalizada pola gravedá de les llesiones. L’agresión foi preparada, la victima escoyida y la premeditación probada. Según la investigación, los presuntos autores taben venceyaos -¡sospresa!- a entornos d’ultradrecha, coordináronse previamente al traviés d’aplicaciones de mensaxería y, mientres la paliza, profirieron amenaces de muerte ya insultos tránsfobos.

Dos de los arrestos produxéronse n’abril, otros dos en xunu ya’l caberu agora. A los cinco atribúyense-yos delitos d’odiu, llesiones, amenaces y daños, cola agravante de motivación discriminatoria. Hai un datu especialmente significativu: tres de los cinco yá fueren investigaos y deteníos en 2025 por otros delitos d’odiu y discriminación.

Sería un error tratar esti ataque como un sucesu ensin conexón col clima que se ta viviendo n’Asturies. El pasáu mes de mayu la Policía Nacional desarticuló los White Boys, descritos pola Fiscalía como una organización xuvenil neonazi que llegó a reunir alredor de 40 mozos. La operación acabó con 19 detenciones n’Uviéu, Xixón, Avilés y Castrillón. La investigación atribuyó-yos polo menos catorce agresiones y les denominaes «caceríes» contra persones foriates, homosexuales y persones identificaes cola izquierda; nos rexistros apaecieron armes blanques y artefactos incendiarios preparaos pal usu.

En xunu, amás, una agresión nes fiestes de Cagüeñes volvió poner sobre la mesa la presencia d’un ultradrechismu onde la violencia s’entemez cola simboloxía españolista: el grupu de persones qu’atacó a un menor llevaba comu “uniforme” polos blancos con banderes d’España.

Y hai namás unos díes, nes fiestes de San Mateo d’Uviéu, la Policía detuvo a seis mozos pola agresión contra dos miembros d’AMA Asturies. El xefe superior de Policía afirmó que dende’l primer momentu se trabayó sobre un posible delito d’odiu y señaló que los agresores profirieron espresiones homófobes y gritos acordies cola «doctrina de grupos d’ultradrecha», comu «Arriba España» y ataques contra simboloxía LGTBI y antirracista. La investigación identificó a los implicaos como miembros del grupu ultra Symmachiarii.

La oposición ciudadana de pocu valió, tres del manifestamientu pacíficu de más de cinco mil persones peles cais d’Uviéu, les casetes de les fiestes populares tornaron vese atacaes.

Ya nun falamos namás de persones que comparten opiniones reaccionaries nes redes sociales, sinón de grupos de mozos que s’organicen, escueyen víctimes pol so orixe, orientación sexual, identidá de xéneru o ideoloxía y preparen les agresiones.

Los datos del propiu Gobiernu asturianu refuercien esa señal d’alarma. La directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez, informó’l 16 de setiembre de que’l Teléfonu Arcuíris rexistrara 41 agresiones físiques o verbales en tol 2025 y yá 42 nos primeros nueve meses de 2026. Esto ye: ensin acabar l’añu, yá se superare tol rexistru del anterior.

Los cinco arrestaos pola agresión de Piedres Blanques tienen ente 18 y 20 años. Los White Boys tamién taben formaos mayoritariamente por adolescentes y adultos mui mozos. Los implicaos nel ataque de San Mateo pertenecen igualmente a esa franxa d’edá. Interior alertó, amás, de que nel conxuntu estatal la participación de menores nos delitos d’odiu medró casi un 20% como autores en 2025.

Esi ye probablemente ún de los elementos más preocupantes de la situación: una ultraderecha que yá nun se presenta únicamente como una reliquia d’otra dómina, sinón que ye capaz de captar xente mui mozo, crear comunidaes dixitales, organizase per mensaxería y tresformar el despreciu hacia colectivos concretos en violencia física.

La muyer atacada en Piedres Blanques acabó nel hospital. Nun foi una discusión espontánea: según la Guardia Civil, los sos agresores organizáronse previamente pa dir por ella. Cinco persones coordinaes pa buscar una víctima pola so identidá de xéneru, insultala, amenazala de muerte y golpeala.

Esi fechu, xunto cola sucesión d’episodios de los últimos meses, fai difícil siguir tratando cada agresión como un casu independiente.