La convocatoria d’ayeri, presentada baxo l’engañosu nome d’«Asociación de Vecinos Zona Oeste Gijón» volvía dar por ciertos proyectos sociales nel barriu, que l’Alcaldía y les entidaes implicaes yá desmintieren

La campaña de mieu y desinformación alredor de distintos recursos sociales de La Calzada sufrió ayeri, xueves 10 de setiembre, un importante retrocesu na cai. La manifestación anunciada pa les siete de la tarde reunió 47 persones, de les que  namás 17 yeren residentes nel barriu, según el recuentu facilitáu a esti mediu.

La cifra resulta especialmente significativa dempués de selmanes espardiendo masivamente rumores sobre persones ensin llar, inmigración, delincuencia y recursos asistenciales.

El cartel de la convocatoria Recoyía cuatro mentires y una falacia, presentando como amenaces pa la zona oeste cuestiones que, a fecha de la protesta, yá taben desmentíes públicamente. La Casa del Mar nunca fuere una posibilidá pa treslladar a les persones usuaries del Albergue Covadonga nin contemplara la Fundación Mar de Niebla como solución pal treslláu temporal.

Tampoco ye cierto que’l nuevu espaciu de Mar de Niebla na cai Guatemala seya una «nueva Cocina Económica». L’Alcuentru ye un centru comunitariu con formación n’hostelería, actividaes culturales, participación vecinal y un espaciu de comida con aforu aproximáu de 50 persones y accesu organizáu. La propia fundación tuvo que salir públicamente a desmentir que tea abriendo un comedor social.

El tercer elementu del cartel, la referencia a convertir l’albergue de Vicasa nun «centru de menas», tampoco se sostién cola documentación municipal. Vicasa ta proyectáu como albergue xuvenil y de peregrinos, y el Conceyu sacó esti añu a contratación precisamente’l suministru de mobiliariu y equipamientu pa esi usu.

La cuarta, la más grave: la protesta nun foi convocada pola histórica Asociación Vecinal Alfonso Camín nin pola Federación d’Asociaciones Vecinales de Xixón. El cartel atribúi la convocatoria a la denominada «Asociación de Vecinos Zona Oeste Gijón», un colectivu ensin base nel barriu que, a primeros de setiembre, entá taba ultimando la so constitución. La Alfonso Camín y la FAV vienen desmarcándose d’estes movilizaciones y alertando de la tensión creada nel barriu.

La vinculación formal de la convocatoria d’ayeri con Vox nun ta acreditada públicamente de manera suficiente como pa atribuyi-y directamente la organización. Sí ta documentada la intervención activa de Vox na polémica; llegó incluso a señalase la presencia d’un asesor de Vox nuna de les movilizaciones anteriores.

Tres d’eses cuatro mentires ta la falacia: de ser ciertes eses falses noticies tariamos falando de la creación de centros de sofitu social, non de menacies públiques.

El problema real del barriu y de Xixón ye, precisamente, bastante distintu del dibuxáu por esti tipu de propaganda. L’ensinllarismu sigue medrando na ciudá, con más persones en situación de vulnerabilidá severa, mientres la emerxencia habitacional fai aumentar la demanda de recursos sociales y la dificultá p’acceder a una vivienda afecta cada vegada a sectores más amplios de la población.

La respuesta a esa situación ye una cuestión de modelu social. Hai meses que la ciudadanía salió a la cai en Xixón pa reclamar el drechu a una vivienda digna, y la declaración de Xixón como zona residencial tensionada confirma que la precariedá habitacional nun ye un problema importáu por persones vulnerables, sinón una crisis estructural, polo que de ser cierto que fueren a crease esos albergues, taríen respondiendo a necesidaes reales de la ciudá y en concretu d’un barriu que ta viendo a diariu comu medren les situaciones de vulnerabilidá ente los propios vecinos.

La Calzada ye un barriu marcáu pola historia industrial, el movimientu obreru, l’asociacionismu y la solidaridá vecinal. Convertir les persones probes, les migrantes o les usuaries de recursos sociales en responsables de problemes como la inseguridá, la falta de vivienda o’l deterioru de los servicios públicos implica desplazar la responsabilidá hacia quien menos capacidá tien pa defendese.

La escasa participación d’ayeri indica que, polo menos nesta ocasión, la estratexa de repetir rumores desmentíos y presentalos como amenaces inmediates nun consiguió movilizar al barriu.

Eso nun significa que’l problema tea acabáu. Los bulos siguen circulando y el clima de confrontación construyíu alredor de los recursos sociales continúa. Pero la movilización del 10 de setiembre dexa una señal clara: La Calzada ye un barriu obreru que nun ta dispuestu a asumir un discursu de mieu y estigmatización.

This work is licensed under a Creative Commons Attribution 4.0 International License.